Elbasy Chehııa jáne Ózbekstan Prezıdentterimen kezdesedi
ASTANA. QazAqparat - Aqordanyń baspasóz qyzmeti Memleket basshysy Nursultan Nazarbaevtyń qatysýymen ótetin aldaǵy is-sharalar ańdatpasyn jarııalady.
Qazaqstan Prezıdenti 24 qarashada elimizge resmı saparmen keletin Chehııa Prezıdenti Mılosh Zemanmen kezdesedi dep josparlanyp otyr.
Sapar saýda-ekonomıkalyq, kólik-tranzıttik, aýyl sharýashylyǵy jáne mádenı-gýmanıtarlyq salalardaǵy ekijaqty ózara yqpaldastyqty nyǵaıtýǵa qosymsha serpin beredi dep kútilýde.
Sonymen qatar mashına jasaý, energetıka jáne týrızm salalaryndaǵy yntymaqtastyqtyń bolashaǵy zor.
Buǵan qosa, 25 qarashada Qazaqstanǵa Ózbekstan Respýblıkasynyń Prezıdenti Islam Karımov resmı saparmen keledi, sapar aıasynda joǵary deńgeıdegi ekijaqty kezdesýler ótedi.
Eki eldiń kóshbasshylary Qazaqstan Prezıdentiniń 2013 jyly maýsymdaǵy Ózbekstanǵa barǵan saparynda jasalǵan ýaǵdalastyqtardyń júzege asý barysyn talqylaıtyn bolady.
Nursultan Nazarbaev pen Islam Karımov saýda-ekonomıkalyq, sý-energetıkalyq, kólik jáne mádenı-gýmanıtarlyq salalardaǵy ózara is-qımyldyń basymdyǵy bar baǵyttaryn qarastyrady.
