Elbasy burynǵy qarjy mınıstri Aleksandr Batsýlanyń qazasyna oraı kóńil aıtty

NUR-SULTAN. QazAqparat – QR Tuńǵysh Prezıdenti Nursultan Nazarbaev Qazaqstannyń burynǵy qarjy mınıstri Batsýla Aleksandr Efımovıchtiń qazasyna oraı kóńil aıtty. QazAqparat bul týraly Elbasy saıtyna silteme jasap habarlaıdy.

Qazaqstannyń Tuńǵysh Prezıdenti Qazaq KSR-nyń burynǵy qarjy mınıstri Aleksandr Batsýlanyń ómirden ótkeni týraly sýyt habardy kúızelispen qabyldady.

«Ol esepshiden Qazaq KSR-nyń qarjy mınıstrine deıingi eńbek jolynda jemisti qyzmet atqaryp, osy salanyń damýyna súbeli úles qosty.

Men ony respýblıkanyń Mınıstrler Keńesinde birge jumys istegen kezimizden jaqsy bilýshi edim. Aleksandr Efımovıch joǵary kásibı biliktiligimen, berik ustanymdarymen, adamı qasıetterimen erekshelenetin.

Aleksandr Batsýlanyń jarqyn beınesi ony biletin adamdardyń júreginde árdaıym saqtalady», – delingen jedelhatta.

Batsýla Aleksandr Efımovıch búgin, 96 jasyna qaraǵan shaǵynda Almaty qalasynda qaıtys boldy.