Elbasy bıznes ıelerine: Sizder jumys oryndaryn saqtaý arqyly qoǵamǵa qamqorlyq kórsetesizder
«Kompanııa ıeleri ózderiniń qolastynda eńbek etip júrgen jandarǵa qarjylaı da, moraldyq turǵydan da járdemdesedi dep senemin. Máselen, ýaqytsha demalysqa jiberýge májbúr bolǵan jaǵdaıda eńbekkerlerdi aqyly túrde bosatqan nemese qysqartylǵan jumys kestesine kóshken abzal. Otandyq bıznes ókilderin jaldamaly qyzmetkerlerdi jumystan shyǵarmaýǵa shaqyramyn. Sizder jumys oryndaryn saqtaý arqyly qoǵamǵa qamqorlyq kórsetesizder», - dep atap ótti Qazaqstannyń Tuńǵysh Prezıdenti.
Onyń aıtýynsha, qazirgi ýaqytta eń áýeli asa muqtaj jandarǵa kómek kórsetý kerek.
«Meniń tapsyrmammen «Nur Otan» partııasynyń jobalary aıasynda 150 mıllıon teńge bólindi. Bul qarajat karantın jarııalanǵan Nur-Sultan jáne Almaty qalalaryndaǵy áleýmettik jaǵdaıy tómen azamattarǵa ataýly kómek kórsetýge jumsalady. Koronavırýs ınfektsııasynyń taralýyna jol bermeý úshin meniń sheshimmen Tuńǵysh Prezıdent qory esebinen taǵy 200 mıllıon teńge bólindi. Jalpy, koronavırýsqa qarsy kúreske arnalǵan qarajattyń durys jumsalýyn «Nur Otan» partııasy baqylaýynda ustaıdy dep oılaımyn», - deıdi Elbasy.
Nursultan Nazarbaev úlken kisilerdi, balalar úıi tárbıelenýshileri men arnaýly aýrýhanalardaǵy naýqastardy qajetti zattarmen úzbeı qamtamasyz etýge basa kóńil bólgen jón ekenin aıtty. Elimizdiń kómekke muqtaj árbir azamatyna qamqorlyq kórsetilýge tıis.
«Qazaqstandyqtar qıyn kezeńde árdaıym bir-birine járdemdesken. Bul iske eriktiler qozǵalysynyń ókilderi de atsalysady dep senemin. Sondaı-aq, biz pandemııamen kúrestiń «aldyńǵy shebinde» júrgen dárigerler men medbıkelerdi, quqyq qorǵaý organdary men áskerı qyzmetkerlerdi qoldaýymyz kerek. Olardyń ıyǵyna aýyr júk túsip, zor jaýapkershilik artylyp otyr. Jurtshylyqtyń olarǵa kómektesip, túsinistik tanytýǵa jáne barlyq nusqaýyn jaýapkershilikpen oryndaýǵa tyrysqany jón», - dep atap ótti Nursultan Nazarbaev.
