Elbasy: Biz qysqartqan jerlerde sheneýnikter ne úshin otyr
«Ótken jyly Dúnıejúzilik banktiń bıznesti jeńil júrgizý reıtınginde 35 oryndy aldyq. Shynymen de jaqsy kórsetkish. Alaıda, osy baǵytta bıznestiń aıtarlyqtaı jaqsarǵanyn ázirge baıqaǵanym joq»,-dedi Elbasy Úkimettiń keńeıtilgen májilisinde.
Memleket basshysynyń sózine qaraǵanda, byltyrǵy toǵyz aıdyń qorytyndysy boıynsha shaǵyn jáne orta bızneste taýarlar shyǵarý men qyzmet kórsetý kólemi jeti paıyzǵa tómendedi. ShOB-taǵy jumys istep turǵan sýbektiler sany jeti paıyzǵa, al jumyspen qamtylǵandar úsh paıyzǵa azaıdy.
«Árıne, baǵamnyń aýytqýy yqpal etkeni anyq, biraq bul kórsetkishter múldem basqa máseleni baıqatyp otyr. Eger de bızneske rettegish júkteme únemi artyp otyrsa, onda olar ósimdi qalaı qamtamasyz etedi?!»,-dep toqtaldy Memleket basshysy.
Respýblıkada tekserý men baqylaýshy qyzmetterdi 61 vedomstvo júzege asyrady eken, onyń 45-i ortalyq, al qalǵan 16-sy jergilikti jerlerde.
«Jaqynda Baqytjan Ábdirulymen (QR Premer-Mınıstri) sóılesken edim. Tisti emdeý jóninde jeke klınıkalar bar. Al basqa aýrýlar boıynsha nege osylaı istemeıdi? ıAǵnı, jeke klınıkany ashýǵa, jeke bıznesti iske qosýǵa múmkindik bermeı otyr. Nege? Bul kemshilikterdi joıý óz qolymyzda ǵoı?! Kim ony istep jatyr? Biz talqylap, sheshim qabyldaımyz, al is júzinde basqasha bolady. «Atameken» UKP málimetine qaraǵanda, kásipkerlerge 28 myńnan astam talaptar qoıylady. Tımýr Muratuly (Ulttyq ekonomıka mınıstri), sen keldiń ǵoı mınıstrlikke, endi osy máseleni sheshetin shyǵarsyń?! Úkimet josparly tekserýler toqtatylǵanyn, táýekelderdi basqarýdyń jańa júıeleri engizilgenin, memlekettik qyzmetter elektrondy formatqa kóshirilgenin málimdep júr, biraq ta tekserýshi organdardyń qysqarýy oryn almaı jatyr. Biz qysqartqan jerlerde sheneýnikter ne úshin otyr? Tekserýshilerdi qysqartqanymyzben, sheneýnikter sany burynǵysynsha qalýda»,-dedi N. Nazarbaev.
Osy oraıda Elbasy Úkimetke, Bas prokýratýraǵa jáne «Atameken» UKP-ǵa birlese qadaǵalaý men tekserý qyzmetteriniń sanyna aýqymdy revızııa júrgizýdi, sondaı-aq onyń nátıjesin bir aıdyń ishinde baıandaýdy tapsyrdy.