Elbasy: Biz bes memleketti jumyldyryp, biregeı ekonomıkalyq odaq qurdyq
Elbasy shaǵyn quramdaǵy basqosýdan keıin Joǵary Eýrazııalyq ekonomıkalyq keńestiń keńeıtilgen quramdaǵy otyrysyna qatysty.
Jıynda sóz sóılegen Nursultan Nazarbaev «Joǵary Eýrazııalyq ekonomıkalyq keńestiń qurmetti Tóraǵasy» ataǵyn berý jónindegi bastamasy úshin Reseı Federatsııasynyń Prezıdenti Vladımır Pýtınge jáne Joǵary Eýrazııalyq ekonomıkalyq keńestiń barlyq múshelerine Reseıdiń osy usynysyn qoldaǵany úshin rızashylyq bildirdi.
Qazaqstannyń Tuńǵysh Prezıdenti Eýrazııalyq ekonomıkalyq odaqtyń qurylý tarıhyna toqtalyp, ıntegratsııalyq birlestiktiń Eýrazııa keńistiginde qalyptasýynyń negizgi nátıjelerin atap ótti.
Elbasy Eýrazııalyq ekonomıkalyq odaq Jer sharynyń 184 mıllıon turǵyny bar orasan zor bóliginiń ómirlik mańyzy bar saýda-ekonomıkalyq dálizi sanalatynyn atap ótti.
«Biz bes memlekettiń kúsh-jigerin jumyldyryp, orasan zor aýmaqta biregeı ekonomıkalyq odaq qurdyq. Bizdiń bıznes qaýymdastyqtarymyz tyǵyz yntymaqtasyp, Eýrazııalyq ekonomıkalyq odaqtyń múmkindikterin paıdalanýda. Qazaqstanda Odaq elderimen birlese qurǵan kásiporyndardyń sany 11 myńǵa jetti», - dedi Nursultan Nazarbaev.
Joǵary Eýrazııalyq ekonomıkalyq keńestiń qurmetti Tóraǵasy álem elderiniń 40-qa jýyǵy Odaqtyń jumysyna qyzyǵýshylyq tanytyp otyrǵanyn aıtty.
Sondaı-aq, Qazaqstannyń Tuńǵysh Prezıdenti teń áriptestik pen bir-biriniń naryǵyna erkin kirýge qatysty Odaqtyń rettelmegen máselelerine toqtaldy.
«Elderimizdiń ortaq ǵylymı-ódiristik áleýetin ońtaıly iske asyrýdy qamtamasyz etetin ónerkásiptik kooperatsııa ázirge ıntegratsııanyń ózegine aınalmady. Odaq alǵashqy bes jyldyqtaǵy qarqyndy damý satysynan keıin ilgerileýdiń kúrdeli ári baıaý kezeńine qadam basty», - dedi Elbasy.
Álemde qalyptasqan jaǵdaıǵa jáne óńirlik úrdisterge baılanysty, Nursultan Nazarbav ıntegratsııalyq úderisti odan ári damytýǵa qatysty óz oıyn ortaǵa saldy.
«Eýrazııalyq ekonomıkalyq odaqtyń strategııalyq aıasyn keńeıtip, ıntegratsııa ıdeıasyn ilgeriletý qajet. Biz Eýrazııalyq ekonomıkalyq odaq, Eýropa odaǵy, Shanhaı yntymaqtastyq uıymy jáne Ońtústik Shyǵys Azııa elderi assotsıatsııasy arasynda jan-jaqty ekonomıkalyq yntymaqtastyq ornatýymyz kerek. Eýrazııalyq ekonomıkalyq keńistiktiń mánisi tuıyqtalýda emes, kerisinshe, ony jahandyq ózara is-qımyl úshin barynsha ashyq etýde», - dedi Nursultan Nazarbaev.
Elbasy birlesken iri ınfraqurylymdyq jobalardy ázirleý jáne júzege asyrý úshin tıisti jumystardy jandandyrý qajettigin aıtty.
«Qytaıdyń «Bir beldeý, bir jol» bastamasy ınfraqurylym men logıstıkaǵa qatysty bóliginde Eýrazııalyq ekonomıkalyq odaq áleýetiniń jalǵasy retinde qarastyrylýǵa tıis. Bul bastama bárimiz úshin utymdy bolady. Onyń ekonomıkalyq yqpaly orasan zor bolyp, birlestiktiń ishki jáne syrtqy maqsattaryna qol jetkizýge septigin tıgizedi», - dedi Qazaqstannyń Tuńǵysh Prezıdenti.
Sonymen qatar, Nursultan Nazarbaev múshe-memleketterdiń ishki óndirisin damytýǵa baǵyttalǵan «aqyldy ıntegratsııany» júzege asyrýdyń mańyzdylyǵyna toqtaldy. - Saýda teke-tiresi jaǵdaıynda naryqtardy jaýlaý úshin jańa strategııa qajet. Mysaly, AQSh pen Qytaıdyń bir-birine sanktsııa engizýine baılanysty óndiris tizbeginde belgili bir tapshylyq bolady. Osy tusta bosaǵan naryqty toltyrý úshin óz taýarymyzdy nege usynbasqa? Biz bul jaǵdaıdy utymdy paıdalana alamyz. Osy jáne basqa da bastamalardy eskerip, 2025 jylǵa deıingi jol kartasyn ázrleýdi usynamyn, - dedi Elbasy.
Sońynda Nursultan Nazarbaev halyqtarymyzdyń ıgiligi úshin ıntegratsııalyq birlestikti odan ári dáıekti damytýdyń mańyzdylyǵyn atap ótti.
«Bul oraıda ekonomıkalyq maqsattarǵa beriktik jáne mindetterdi tek ekonomıkalyq qajettilik turǵysynan júzege asyrý nıeti ınstıtýttarymyzdyń jumysyndaǵy negizgi basymdyq bolýǵa tıis. Barshańyzǵa tolaǵaı tabys tileımin», - dedi Qazaqstannyń Tuńǵysh Prezıdenti.
