Elbasy bıylǵy halyqqa Joldaýynda elimizdiń 20 jyldaǵy júrip ótken jolyna tııanaqty, túıindi qorytyndy jasady - U. Sydyqov

Bul jaıynda Q. Sátbaev atyndaǵy QazUTÝ-diń oqý-tárbıe isi jónindegi prorektory, professor, Qazaqstannyń eńbek sińirgen qaıratkeri Ulyqpan Sydyqov QazAqparat tilshimen suhbattasý barysynda aıtty.

U.Sydyqov Elbasynyń bıylǵy halyqqa Joldaýyn tebirene tyńdap, erekshe ásermen qabyldaǵanyn aıtady. «Birinshi bizdiń túıgenimiz - 20 jylda buryn-sońdy eshbir memleket, tipten Ońtústik Koreıa, Malaızııa, Sıngapýr syndy memleketter ótpegen úlken jetistikke jetkenimizdi bildik. Tek qana jan basyna shaqqandaǵy ishki ónimniń ózi 12 esege artqany bizdi erekshe qýantty», -deıdi professor.

Sonymen qatar ol halqymyzdyń rýhy, eńsesi kóterilip, Qazaqstandy kúlli álem tanyǵandyǵyn jáne bizdiń aldaǵy damý josparlarymyz jasalyp, oǵan búkil qazaqstandyqtardyń úles qosyp jatqandyǵy qýantarlyq jaǵdaı ekendigin jetkizdi. «Onyń bir aıǵaǵy Prezıdentimizdiń ókilettiligin taǵy da 10 jylǵa uzartý jónindegi bastamaǵa búkil halyqtyń qyzý qoldaý kórsetýi», -deıdi ol.

Sondaı-aq ol búgingi Joldaýdyń taǵy bir ereksheligi - Prezıdenttiń áleýmettik máselege basa nazar aýdaryp, áleýmettik jańǵyrý, jańa áleýmettik saıasat degen máselege erekshe toqtalǵandyǵyn aıtady. «Onyń ishinde bilim salasy, densaýlyq saqtaý máselesi, jumyssyzdyqpen kúresý jáne turǵyn úı qurylysyn kóterý, jalpy alǵanda halyqtyń ál-aýqatyn jaqsartý, ásirese aýyl turǵyndaryna kóńil bólý máselesine erekshe toqtaldy. Bizdiń júregimizge jaqyn bolǵany bilim salasyna baılanysty aıtqan oılary. Kásiptik tehnıkalyq bilimdi damytyp, álemdik deńgeıge kóterý, sonyń ishinde elimizdi ındýstrııalandyrýdy ilgerletetin joǵary bilikti tehnıkalyq mamandar daıyndaý bizdiń ýnıversıtet úshin erekshe mindet», - dep atap ótti óz sózinde Ulyqpan Sydyqov.

U. Sydyqov bilim salasyna tıisti qarajattyń bólinýi qýantarlyq jaǵdaı ekenin aıta kele: «Bilim ordalarynyń álemdik deńgeıdegi qural-jabdyqtarmen qamtamasyz etilýi, kadr máselesin joǵary sapaǵa kóterý, bilim sapasyna álemdik kózqaraspen qarap, bizdiń árbir túlegimizdiń qoǵamdaǵy óz ornyn tabýyna erekshe jaǵdaı týǵyzyp otyr. Sondyqtan da bizdiń ujym bir kisideı jumylyp, Prezıdent Joldaýynyń iske asýyna qyzý iske kirisedi», - dedi.