Elbasy birqatar áskerı, quqyq qorǵaý jáne arnaıy organ qyzmetkerlerin memlekettik nagradalarmen marapattady

ASTANA. QazAqparat - Búgin Aqordada Elbasy Nursultan Nazarbaev áskerı jáne qyzmettik boryshyn úlgili atqarǵany, zańdylyq pen quqyqtyq tártipti qamtamasyz etýde, eldiń ulttyq qaýipsizdigi men qorǵanys qabiletin nyǵaıtýda kórsetken erligi men janqııarlyǵy úshin birqatar áskerı, quqyq qorǵaý jáne arnaıy organ qyzmetkerlerin memlekettik nagradamen marapattady.

Atap aıtqanda, 2-shi dárejeli «Dańq» ordenimen QR QK Bas shtaby bastyǵynyń birinshi orynbasary Rýslan Álimov, Astana qalasynyń prokýrory S.Bekbosynov, QR ІІM Qostanaı oblystyq ishki ister departamentiniń bastyǵy T.Mátkenov, QR Memlekettik kúzet qyzmeti bastyǵynyń orynbasary Q.Orazqulov, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń apparat basshysy A.Shaıymova, 2-shi dárejeli «Aıbyn» ordenimen QR Bas prokýratýrasynyń departament bastyǵy R.Dosymbekova, QR UQK Shekara qyzmeti 1-avıatsııa bazasy komandıriniń orynbasary M.Kaýshenov, QR QM 44803 áskerı bóliminiń komandıri N.Qabaqov, QR QK Qurlyq áskerleri bas qolbasshysy basqarmasy bas shtaby bastyǵynyń orynbasary - Jedel bas basqarmasynyń bastyǵy A.Stepanenko, 3-shi dárejeli «Aıbyn» ordenimen QR QK Áýe qorǵanysy kúshteriniń serjanty - Áýe qorǵanysy kúshteri bas qolbasshysy basqarmasynyń bólim bastyǵy S.Shorahanov marapattaldy.

Munan bólek, birqatar áskerı, quqyq qorǵaý jáne arnaıy organ qyzmetkerleri Elbasy qolynan «Erligi úshin» jáne «Jaýyngerlik erligi úshin» medaldaryn aldy.

«Búginde shekaramyzdyń qaýipsizdigin, halqymyzdyń amandyǵyn senimdi sarbazdar kúzetip tur. Olar ata-babamyzdyń erlik dástúrin laıyqty jalǵastyryp, aǵa býyn amanatyna adal boldy. Elge qorǵan bolý úshin er-azamatqa qajymas qaırat, asqaq rýh qajet ekeni anyq», - dedi Elbasy marapattaý rásiminde.