Elbasy bıdaı jáne onyń ónimderi eksportynyń jalpy kólemindegi unnyń úlesin arttyrý týraly tapsyrma berdi
nbsp;ASTANA. Tamyzdyń 3-i. QazAqparat - Elbasy Nursultan Nazarbaev Úkimetke bıdaı jáne onyń ónimderi eksportynyń jalpy kólemindegi unnyń úlesin arttyrý týraly tapsyrma berdi,
dep habarlaıdy QR Prezıdenti Ákimshiliginiń baspasóz qyzmeti.
Baspasóz qyzmetiniń habarlamasynda aıtylǵanyndaı, búgin Elbasynyń qatysýymen aýyl sharýashylyǵynyń ózekti máselelerine arnalǵan otyrys ótip, onyń barysynda N.Nazarbaev Úkimetke birqatar mindetter júktedi.
«Aǵymdaǵy qıyndyqtarǵa qaramastan, 2010-2011 jyldar aralyǵyndaǵy marketıngtik jyldyń eksporttyq áleýeti shamamen 8 mln. tonna bolmaq. Oryn alǵan jaǵdaı otandyq un shyǵarýshylar úshin shetel naryǵyna shyǵatyn tamasha múmkindik bola alady. Soǵan oraı, Prezıdent Úkimetke bıdaı jáne onyń ónimderi eksportynyń jalpy kólemindegi unnyń úlesin arttyrý týraly tapsyrma berdi», dep aıtylǵan baspasóz habarlamasynda.
Baspasóz qyzmetiniń málimetteri boıynsha, Qazaqstan Prezıdenti N. Nazarbaev Úkimetke unnyń jáne nannyń ishki baǵasynyń turaqtylyǵyn saqtap turýdy, olardyń naryqtaǵy baǵalarynyń joǵarylaýyna jol bermeýdi tapsyrdy. Sonymen qatar, Elbasy qurǵaqshylyqtan japa shekken aýylsharýashylyǵy ónimderin óndirýshilerdiń qarjylyq jaǵdaıyna taldaý jasap, olardy qoldaýǵa arnalǵan arnaıy sharalardy iske asyrý, mal sharýashylyǵyn jemmen qamtamasyz etý, jemshópti jınaýǵa qajetti janar-jaǵarmaı ónimderin jetkizý jáne kelesi jylǵy egin egý naýqanyna arnalǵan tuqymdardyń qoryn jasaqtaý mindetin qoıdy.
