Elbasy BǴM men EDSM-ge otandyq eńbek naryǵynyń bolashaǵyna saraptama jasaýdy tapsyrdy
ASTANA. 25 jeltoqsan. QazAqparat - Búgin Memleket basshysy Nursultan Nazarbaev Indýstrııalandyrý kartasy jobalaryn tanystyrý boıynsha kezekti jalpyulttyq telekópir barysynda Bilim jáne ǵylym mınıstrligi men Ekonomıkalyq damý jáne saýda mınıstrligine otandyq eńbek naryǵynyń bolashaǵyna saraptama jasaýdy tapsyrdy.
Memleket basshysynyń atap ótýinshe, ekonomıkany, jańa salalardy jańǵyrtý, zamanaýı tehnologııalardy qoldaný eldiń eńbek resýrstary talabyn arttyrady. Bul ýnıversıtetterden, kásibı bilim berý júıesi mekemelerinen ózderiniń bilim berý baǵdarlamalaryn jańǵyrtýdy talap etedi.
«Bilim jáne ǵylym mınıstrligine Ekonomıkalyq damý jáne saýda mınıstrligimen birlesip otandyq eńbek naryǵynyń bolashaǵyna saraptama jasaýdy, ınnovatsııalyq ekonomıka úshin jańa kadrlardy daıyndaýdy qamtamasyz etýdi tapsyramyn», - dedi QR Prezıdenti.
