Elbasy Besinshi Kaspıı sammıtine daıyndyq máseleleri jóninde keńes ótkizdi

ASTANA. QazAqparat - Jıynǵa Prezıdent Ákimshiliginiń Basshysy Á.Jaqsybekov, Syrtqy ister mınıstri Q.Ábdirahmanov, Prezıdenttiń kómekshisi N.Onjanov, Qorǵanys mınıstri S.Jasuzaqov jáne ortalyq memlekettik organdar ókilderi qatysty, dep habarlaıdy QazAqparat akorda.kz-ge silteme jasap.

Basqosýda Kaspıı teńiziniń quqyqtyq mártebesi týraly konventsııaǵa jáne ózge de kelisimderge qol qoıýǵa ázirlik barysy talqylandy, sondaı-aq Memleket basshysynyń qatysýymen ótetin aldaǵy halyqaralyq is-sharalar kestesi qarastyryldy.

- Biz Kaspıı sammıtine kóp jyldar boıy daıyndaldyq. Sarapshylarymyz sheteldik áriptesterimen birlesip, aýqymdy jumys atqardy. Sonymen qatar, Túrikmenstanda halyqaralyq Araldy qutqarý qoryn qurýshy memleketter basshylarynyń kezdesýi ótedi. Biz soǵan qatysýymyz kerek, - dedi Qazaqstan Prezıdenti.

Keńeste Syrtqy ister mınıstri Q.Ábdirahmanovtyń Besinshi Kaspıı sammıtine daıyndyq barysy jónindegi esebi tyńdaldy.

- Besinshi Kaspıı sammıtiniń aıasynda Kaspıı teńiziniń quqyqtyq rejimin anyqtaý úshin kóp jylǵy kelissózderdi aıaqtaý josparlanýda. Kaspıı jaǵasyndaǵy elderdiń teńizdi paıdalaný jónindegi quqyqtary men mindetterine baılanysty búkil máselelerdi retteýge múmkindik beretin Kaspıı teńiziniń quqyqtyq mártebesi týraly konventsııa sammıttiń negizgi qujaty bolyp sanalady, - dedi Q.Ábdirahmanov.

Nursultan Nazarbaev Kaspıı mańy elderi arasyndaǵy ózara tıimdi ekonomıkalyq qarym-qatynastardy nyǵaıtýǵa baǵyttalǵan Konventsııaǵa qol qoıýdyń mańyzdylyǵyn erekshe atap ótti.

Jıyn sońynda Memleket basshysy Besinshi Kaspıı sammıtin ótkizýge daıyndyq jónindegi jumystardy jalǵastyrýdy tapsyrdy.