Elbasy Bes áleýmettik baǵdarlamaǵa qansha qarajat jumsalatynyn atady
«Birden aıtarym - bul memleket úshin arzanǵa túsip otyrǵan joq. Bes áleýmettik baǵdarlamany júzege asyrý úshin 2 trln 600 mlrd teńge baǵyttaý josparlanyp otyr. Bul - asa aýqymdy qarajat. Bul - bizdiń azamattarǵa jáne bolashaqqa salynǵan salym. Biz azamattardyń ál-aýqatyn arttyrý úshin osynshama qarajatty jınaı aldyq. Bizdiń halyq osyny laıyqty baǵalar degen úmittemin. Osyndaı saıasatty ary qaraı jalǵastyra beremiz», - dedi Memleket basshysy.
Nursultan Nazarbaev Bes áleýmettik bastama - azamattardyń ál-aýqatyn kóterýge baǵyttalǵan bes aýqymdy áleýmettik joba ekenin aıtty.
«Eń bastysy - osylardyń barlyǵy da árbir qazaqstandyqtyń ál-aýqatyn arttyrý úshin búkil qoǵamǵa baǵyttalǵan. Bul jalpyulttyq baǵdarlamalar. Men osy jumysqa maqsattardy júzege asyrý úshin «Nur Otan» partııasymen birge Assambleıanyń aralasqanyn qalar edim», - dedi Elbasy.
Aıta ketsek, elordadaǵy Beıbitshilik jáne kelisim saraıynda Nursultan Nazarbaevtyń tóraǵalyǵymen Qazaqstan halqy Assambleıasynyń XXVІ sessııasy ótip jatyr.
«Bes áleýmettik bastama - qoǵamnyń áleýmettik birliginiń tuǵyry» degen kún tártibimen bastalǵan sessııa jumysyna 1 500-den astam adam qatysýda. Olardyń qatarynda eldiń barlyq óńirlerinen kelgen Assambleıanyń ardagerleri, respýblıkalyq jáne óńirlik etnomádenı birlestikterdiń tóraǵalary, Parlament depýtattary, ortalyq atqarýshy organdardyń, saıası partııalardyń, dinı birlestikterdiń, úkimettik emes uıymdardyń basshylary, JOO rektorlary, shet memleketterdiń dıplomatııalyq mıssııalarynyń, ǵylymı, shyǵarmashyl zııaly qaýymnyń jáne BAQ-tyń ókilderi bar.
Sessııa sońynda saltanatty kontsert ótedi.
