Elbasy belgili jazýshy Ánes Saraıdy 75 jyldyq mereıtoıymen quttyqtady
ASTANA. 23 qarasha. QazAqparat - QR Prezıdenti Nursultan Nazarbaev belgili qazaq jazýshysy, Memlekettik syılyqtyń ıegeri Ánes Saraıdy 75 jyldyq mereıtoıymen quttyqtap, hat joldady. Elbasynyń quttyqtaý hatyn búgin Eýrazııa ulttyq ýnıversıtetinde jazýshynyń mereıtoıyna arnalǵan keshte QR Memlekettik hatshysy Muhtar Qul-Muhammed oqyp berdi.
«Sizdi 75 jyldyq mereıtoıyńyzben shyn júrekten quttyqtaımyn! Bizdiń halqymyz sizdi keńinen tanymal jazýshy, oqymysty adam retinde jaqsy biledi jáne syılaıdy. Siz óz eńbek jolyńyzdy jýrnalıst retinde bastap, kóptegen jyldar boıy elimizdiń merzimdi baspasózinde, shyǵarmashylyq odaqtarynda jáne kitap baspalarynda talmaı qyzmet ettińiz», - delingen N.Nazarbaevtyń quttyqtaý hatynda. Budan bólek, Prezıdent jazýshynyń qalamynan kóptegen ocherkter men maqalalar, áńgimeler men povester, romandar men dramalyq týyndylar dúnıege kelgenin, tarıhı zertteýler jazylǵanyn aıtyp, osynyń barshasy qazaq ádebıetine qosylǵan zor úles ekendigin alǵa tartady. Sonymen qatar, Memleket basshysy mereıtoı ıesine myqty densaýlyq, uzaq ǵumyr men jańa shyǵarmashylyq tabystar tiledi.
