Elbasy Batyr Baıannyń beınesin somdaǵan akter Jumahan Ábdiqadyrovqa 5 mln. teńge berdi

Osy kınotýyndyda Batyr Baıannyń beınesin teatr jáne kıno akteri, eńseli kelgen boı­y­na erekshe talanty jarasqan Jumahan Ábdiqadyrov som­daı­dy. Biraq, ókinishke qaraı, óne­ri jurt kóńilinen shyqqan osy eńbekqor akter biraz jyl bu­ryn shyǵarmashylyq qyzmet­pen saparda júrgen kezinde jol-kólik apatyna ushyrap, múgedek bolyp qalǵan edi.

Taǵdyr taýqymetine ne shara, osydan keıin ol teatrdan ketip, Taraz qalasynyń shetindegi avto­tu­raqtardyń birinde qaraýyl bo­lyp júrdi. Sahnaǵa da oralyp kórdi. Biraq synǵan súıek ıkemge kele qoımady. Dárigerge de qa­ral­dy, emshige de bardy. Birneshe ret otaǵa da tústi. Bul týraly kezinde respýblıkalyq gazetterde kóp jazyldy.

Jumahannyń endigi úmiti - shet­eldik otashylardyń kómegine júginip kórý. Biraq ol jaqqa barý, kelý, ota jasatyp, em-dom alý úlken qarjyny qajet etetini belgili. Osy jaǵdaıdan habardar bolǵan Elbasy Nursultan Nazarbaev jaqynda akterge qa­jet­ti qarajatty bólýge pármen ber­di. Ol somany, eli­miz­diń Tuńǵysh Prezıdenti qory aýdar­dy. Qazaq halqynyń bos­tan­dyǵy jolynda kúresken Batyr Baıan­nyń beınesin somdap, búgingi ur­paq­ty el tarıhyn bilip, qurmet­teýge úles qosqan ártis úshin bul úlken qurmet bolatyn.

Jaqynda gazettiń oblystaǵy menshikti tilshisiniń qosynyna akter Jumahan Ábdiqadyrovtyń jary, talantty aktrısa Gúlshat Qypshaqova habarlasyp:

- Prezıdent Nursultan Nazarbaev «Batyr Baıan» fılminiń alǵashqy dýblderi bastalar kezde túsirý alańyna arnaıy kelip, shyǵarmashylyq jumysymyzǵa aq jol tilegen bolatyn. Elbasy úmitin rejısser de, akterler de aqtady. Endi, mine, sol fılmdegi basty róldi oınaǵan Ju­mahan taǵdyr taýqymetine ushy­rap, múgedek bolyp qalǵan kezde Prezıdent taǵy da kómek qolyn sozyp otyr. Búginde jubaıymnyń atyna ashylǵan esep-shotqa Elbasy qorynan 5 mln. teńge qarajat kelip tústi. Biz muny qazaq teatry men kıno ónerine degen eldik qam­qorlyq dep bilemiz, - degen edi óziniń júrekjardy qýanyshyn jasyra almaı.

Búginde oblystyq qazaq drama teatrynyń aktrısasy Gúlshat Qypshaqova súıikti jary Jumahannyń aıaǵynan tik turyp ketýi úshin sheteldik otashy-dárigerlermen sóılesip, qajetti qujattaryn daıyndaý ústinde»,-dep jazady «Egemen Qazaqstan» basylymy.