Elbasy bastamasynyń 25 jyldyǵyna oraı halyqaralyq shara ótedi
NUR-SULTAN. QazAqparat - 11 sáýirde Nur-Sultan qalasynda QR Tuńǵysh Prezıdenti - Elbasy Nursultan Nazarbaevtyń Eýrazııalyq bastamasyna 25 jyl tolady.
Osyǵan qaraı «Ideıadan - shynaıy bolmysqa: Nursultan Nazarbaevtyń Eýrazııalyq bastamasyna 25 jyl» taqyrybynda Halyqaralyq ǵylymı-praktıkalyq konferentsııa ótedi. Bul týraly búgin QR SІM resmı ókili Aıbek Smadııarov aıtty, dep habarlaıdy QazAqparat tilshisi.
Onyń aıtýynsha, is-sharany elimizdiń Tuńǵysh Prezıdenti - Elbasy Kitaphanasy men Qory, M.Lomonosov atyndaǵy Máskeý memlekettik ýnıversıtetimen birlese jáne Qazaqstan Prezıdenti Ákimshiligi, Reseı Prezıdenti Ákimshiligi, Qazaqstan, Reseı syrtqy ister mınıstrlikteri, sondaı-aq Mádenıet jáne sport mınıstrligi jáne Nur-Sultan qalasynyń Ákimdiginiń qoldaýymen uıymdastyrady.
Konferentsııanyń resmı ashylýyna Qazaqstan men Reseı prezıdentteri Ákimshilikteri jáne Eýrazııalyq ekonomıkalyq komıssııa ókilderi, Qazaqstan men Reseı parlamentteriniń depýtattary jáne taǵy basqalar qatysady.
«Konferentsııa Tuńǵysh Prezıdent - Elbasy Nursultan Nazarbaev osydan 25 jyl buryn Máskeý memlekettik ýnıversıtetinde alǵashqy ret jarııa etken eýrazııalyq ıntegratsııa men Eýrazııalyq odaqty qurý ıdeıalarynyń iske asyrylýynyń strategııalyq kórinýi men baǵyttaryn paıymdaýdy uıǵarady. Jalpy, Elbasynyń pikirinshe, ıntegratsııanyń mundaı túri odaqqa qatysýshy árbir eldiń memlekettik múddeleri iske asyrylatyn jáne ekonomıkalyq yntymaqtastyqqa naqty nazar aýdara otyryp, barlyq jıyntyq áleýeti paıdalanylatyn teń quqyly táýelsiz memleketter odaǵy bola alar edi», - dedi ol.
Sonymen qatar resmı ókil 2019 jyly 29 mamyrda Nur-Sultan qalasynda Eýrazııalyq ekonomıkalyq odaqtyń qurylýynyń 5 jyldyǵy men eýrazııalyq ıntegratsııa ıdeıasynyń 25 jyldyǵy aıasynda Joǵary Eýrazııalyq ekonomıkalyq keńestiń otyrysy ótetindigin aıtty.
«Oǵan Odaqqa múshe elderdiń memleket jáne úkimet basshylarynan bólek, qurmetti qonaq retinde Elbasy Nursultan Nazarbaev qatysady», - dedi Aıbek Smadııarov.
