Elbasy bastamasymen qolǵa alynǵan jańa ekonomıkalyq saıasat - elimizdi daǵdarysqa ushyratpaı alyp shyǵar tyń jol - dóńgelek ústel (FOTO)
Onda Qazaqstan halqy BQO assambleıasy tóraǵasynyń orynbasary Ǵaısa Qapaqovtyń atap ótkenindeı, álemdegi jáne eldegi saıası jaǵdaı qazaqstandyqtardyń odan ári toptasýyn talap etedi. Sondyqtan prezıdenttik saılaýdy zańǵa sáıkes ótkizý ekonomıkany turaqtandyryp, qoǵamdaǵy kelisim men áleýmettik jaǵdaıdy ornyqtyrýǵa, el aldynda turǵan mańyzdy mindetterdi der kezinde sheshýge múmkindik beredi.
Jáńgir han atyndaǵy BQATÝ professory, ekonomıka ǵylymdarynyń doktory Raýshan Ǵabdýalıeva Úkimettiń daǵdarysqa qarsy sharalaryna keńinen toqtalyp, Elbasy usynǵan bıýdjettik shyǵyndardy ońtaılandyrýdyń áleýmettik mindettemeler men memlekettik baǵdarlamalarǵa áser etpeıtinin aıtyp berdi. Qaıta, onyń oıynsha, Prezıdent usynǵan joba-josparlar ishki jalpy ónimdi 4-4,5 paıyz deńgeıinde ustaýǵa múmkindik beredi.
BQO kásipkerler palatasynyń dırektory Keńes Ábsatyrov álemdik daǵdarys salqynyn sezinbes úshin Elbasynyń tóńiregine toptasa bilip, el bolyp daǵdarysqa qarsy sharalardy ońtaıly júzege asyrý qajettigin atap kórsetti. Daǵdarys toqsanynshy jyldary da bolǵan, Elbasymyzdyń bastaýymen talaı synnan ótip, ysylǵan Qazaqstanǵa qazirgi kezeń asa qorqynyshty emes. Memleketimiz óz baǵytymen qarqyndy damı berýi úshin aldymen prezıdenttik saılaýdy qapysyz ótkizip alý kerek. Bolashaq jastardyń qolynda, búgingi stýdentter ozyq ilim-bilimdi ıgerip, jańa turpattaǵy mamandar bolyp qalyptasa bilse, odan, túptep kelgende, búkil elimiz utady. Bir ǵana «Nurly jol» baǵdarlamasy boıynsha elimizde 7,5 myń shaqyrym jańa jol salynbaq. Buǵan qyrýar qarjy jumsalyp, jańa óndirister men myńdaǵan jumys oryndary ashylmaqshy. Osy baǵdarlama aıasynda jas mamandarǵa da jumys tabylary sózsiz.
Qazaqstan halqy BQO assambleıasynyń músheleri, etnomádenı birlestikter jetekshileri Danılbek Saratov, Avetık Amırhanıan, BQATÝ-dyń úzdik stýdentteri Áıgerim Erlanova, Kırıll Denısovtar Elbasy bastamasymen qolǵa alynǵan jańa ekonomıkalyq saıasat elimizdi daǵdarysqa ushyratpaı alyp shyǵar tyń jol ekendigin, aldaǵy prezıdenttik saılaýdyń el múddesine tolyq sáıkesetinin, onyń serpindi damýyna septesetinin jetkizdi.
Jıynǵa qatysýshylar el ekonomıkasy men áleýmettik salasynyń tabysty damýy Elbasy Nursultan Nazarbaevtyń qyzmetine tikeleı baılanysty ekendigi týraly ortaq toqtamǵa keldi. Osyǵan oraı N.Á.Nazarbaevqa aldaǵy prezıdenttik saılaýǵa óz kandıdatýrasyn usynýy kerektigi týraly úndeýdi biraýyzdan qabyldady.
