Elbasy bastamalary jumysshylardyń kóńil-kúıine jaqsy áser beredi - Baqytjan Ábdiraıym
ASTANA. QazAqparat - Elbasynyń áleýmettik bastamalary jumysshylardyń kóńil-kúıin kóterýge baǵyttalǵan. Bul týraly búgin elordada ótip jatqan «Eńbek naryǵy: jahandyq úrdister, máseleler men múmkindikter» atty ǵylymı-tájirıbelik konferentsııada QR Kásipodaqtar federatsııasynyń tóraǵasy Baqytjan Ábdiraıym aıtty, dep habarlaıdy QazAqparat.
«7-20-25» boıynsha ıpotekaǵa qatysty birinshi bastama qurylys, ónerkásip jáne logıstıka naryqtaryn jandandyrýmen qatar qor jáne bank sektorlaryna zor áser beredi. Sonymen qatar jumyssyzdyqty qysqarta túsedi. Aıta keterligi, «7-20-25» formýlasy elimizde alǵash ret qoldanylýda jáne ondaǵan myń otbasynyń páterli bolýyna múmkindik beredi», - dedi konferentsııa jumysyn ashqan B.Ábdiraıym.
Onyń aıtýynsha, salyq júktemesin tómendetý jónindegi ekinshi bastama aıasynda 2019 jyldyń 1 qańtarynan shamamen 2 mıllıon adamǵa júkteme 10 ese tómendeıdi.
«Kelesi bastama bizdiń bolashaǵymyzǵa qatysty. 54 myń granttyń ústine taǵy da 20 myń granttyń bólinýi tek qana 20 myń jastyń taǵdyryna qatysty emes. Naqty derekter keltirsem, Qazaqstanda jumyssyz sanalatyn adamdardyń basym kópshiliginiń joǵary bilimi joq. ıAǵnı, joǵary bilimi joqtar arasyndaǵy jumyssyzdyq koeffıtsıenti joǵary bilimdilerge qaraǵanda joǵary. Demek, jastarymyz joǵary oqý oryndaryn bitirgennen keıin jumys ornyn tabýǵa kepildik alady», - dedi federatsııa tóraǵasy.
Munan bólek ol jataqhana salý bastamasy da stýdentterge jaqsy bilim alýǵa jáne otbasylyq bıýdjet qarajatyn únemdeýge múmkindik beretindigin basa aıtty. Al shaǵyn nesıe berý kólemin arttyrý bastamasy aýyl turǵyndaryna óz isin ashýǵa múmkindik beretindigin atap ótti.
«Biz úshin gazdandyrý da ózekti. Gaz qubyryn tartýdyń ekologııalyq da tıimdiligi bar. Tek elordanyń ózinde ǵana jyl saıyn aýaǵa taralatyn zııandy shyǵaryndylar kólemi 35 myń tonnaǵa azaıady. Jalpy, Memleket basshysynyń barlyq bastamalary jumysshylarymyzdyń áleýmettik kóńil-kúıin kóterýge baǵyttalǵan», - dedi Baqytjan Ábdiraıym.
