Elbasy bastamalary kópbalaly analarǵa úmit syılady - Maqpal Orynbetova

JEZQAZǴAN. QazAqparat - Elbasynyń búgingi «Nur Otan» partııasynyń HVІІІ sezinde aıtylǵan áleýmettik bastamalary - dúıim el kútken oń sheshim boldy. Jýrnalıster odaǵynyń múshesi, kópbalaly ana Maqpal Orynbetova osylaı deıdi, dep habarlaıdy QazAqparat.

«Nur Otan» partııasynyń HVІІІ sezinde memleket basshysy, partııa tóraǵasy Nursultan Nazarbaev respýblıkalyq bıýdjet shyǵyndarynyń 45 paıyzy áleýmettik salaǵa baǵyttalatynyn, áleýmettik jaǵynan az qamtylǵan azamattarǵa qoldaýdy kúsheıtý kerektigin aıtty. Elbasy sondaı-aq, kópten beri qoǵamda qyzý talqyǵa túsip jatqan, kópbalaly analarǵa tólenetin járdemaqyny kóterý jaıly da sóz qozǵaǵan bolatyn.

«Men halqymnyń bolashaqta ǵana emes, qazir baqytty bolǵanyn qalaımyn» degen Memleket basshysynyń sózi kópbalaly analarǵa úmit syılap, qanattandyrǵany sózsiz. Elbasynyń osyndaı qamqorlyǵyn jergilikti jerdegi basshy azamattardyń buljytpaı oryndaýy kerek. Sebebi, bul - ár otbasyna jasalǵan qamqorlyq. Tek osy qamqorlyq jerine jetse eken», - deıdi Maqpal Orynbetova.

Jýrnalıstiń pikirinshe, ásirese kópbalaly otbasynyń ár balasyna beriletin járdemaqyny 21 myń teńgege deıin ósirý bastamasy halyqtyń kóńilinen shyǵatyny anyq.

«Eń bastysy, atalǵan kómekti taǵaıyndaý barynsha jeńildeıtin boldy. Halyq ary-beri shapqylamaıdy. Sondaı-aq, mundaı otbasylardyń tabysyn eseptegende basqa áleýmettik járdemaqylardy sanamaıdy. Bul - tabysy arzymaıtyn kópbalaly otbasylar úshin úlken demeý», - dep atap ótti Jezqazǵan qalasynyń turǵyny Maqpal Orynbetova.

Aıta keteıik, «Nur Otan» partııasynyń HVІІІ sezinde Memleket basshysy Nursultan Nazarbaev birqatar áleýmettik bastamalardy aıtty.