Elbasy Bank RBK problemalaryna qatysty: Jeke tulǵalar óz qarjysyna qol jetkizedi

ASTANA. QazAqparat - Búgin Astanada «Nur Otan» partııasy Saıası Keńesiniń keńeıtilgen otyrysynda Elbasy Nursultan Nazarbaev «Bank RBK» AQ-nyń aınalasyndaǵy problemaǵa qatysty pikir bildirdi, dep habarlaıdy QazAqparat.

Otyrys barysynda «Tutynýshylar Ulttyq palatasy» RQB prezıdenti Svetlana Romanovskaıa sońǵy kezderde «Bank RBK» AQ-ǵa qatysty ahýal qıyndaǵanyn, osynyń saldarynan bank klıentterine tıisti deńgeıde qyzmet kórsetilmeı jatqanyn atap ótti.

Elbasy Nursultan Nazarbaev atalǵan problemamen jaqsy tanys ekenin jetkizdi.

«Bul másele negizinen ózderiniń adamdaryn qarjylandyrý úshin aktsıonerler tarapynan jasalǵan urlyqqa qatysty. Osy turǵyda aktsıonerlerdi tıisti tártipke keltiretin bolamyz. Urylar ózderine "laıyqty jerde" otyrýy kerek. Olardy aqshany qaıtarýǵa májbúrleımiz, ıaǵnı osy banktiń jumysyn turaqtandyrýǵa tyrysamyz. Ásirese, jeke tulǵalar óz qarjysyna qol jetkizetin  bolady»,-dep atap ótti Memleket basshysy.

Osy oraıda Prezıdent búgingi kúni QR Úkimeti men Ulttyq bank belsendi jumys istep jatqanyn, sondaı-aq «Bank RBK»-nyń saqtalýy nazarda turǵanyn jetkizdi.

Esterińizge sala keteıik , jaqynda QR Ulttyq banki tóraǵasynyń orynbasary Alpysbaı Ahmetov Parlament Senatynyń otyrysynda RBK bankine qatysty týyndap jatqan másele týrasynda pikir bildirgen bolatyn.