Elbasy balamaly energetıkany damytý bolashaǵy týraly aıtty

ASTANA. QazAqparat - QR Prezıdenti Nursultan Nazarbaevtyń aıtýynsha, qazirgi kezde Qazaqstanda balamaly energııany naqty tarıfteri men ony satyp alýdyń kepildendirilgen kólemi bar. Ázirshe, ondaı mehanızm tıimdi júıe bolyp sanalady, dep habarlaıdy QazAqparat tilshisi.

«Alaıda tehnologııalar jyldam damyp keledi. Balamaly energııa kún saıyn arzandap jatyr. Endigi kezekte biz aýktsıondar júıesine kóshýimiz kerek. Ondaı júıe kóptegen elderde bar. Týra sondaı júıeni bizde de engizý kerek. Sonyń arqasynda balamaly energetıka salasynda tıimdi jobalardy iriktep otyrýǵa bolady», - dedi Nursultan Nazarbaev Sheteldik ınvestorlardyń búgingi otyrysynda. Osy oraıda Memleket basshysy barlyq ınvestorlardy bızneske jasalyp jatqan qazirgi jeńildikterdi paıdalana otyryp, balamaly energetıkaǵa aqshany kóptep salýǵa shaqyrdy.  

«Búginde «jasyl» ınvestıtsııalar júıesin qurýǵa arnalǵan tujyrymdama daıyndalyp jatyr. Sizderdi atalǵan tujyrymdamany ázirleýge qatysyp, «jasyl» taýarlar men qyzmetterdi keńinen engizýge shaqyramyn. Ol úshin «Astana» halyqaralyq qarjy ortalyǵyn paıdalanýǵa bolady», - dep atap kórsetti Prezıdent.

Aıta keteıik, otyrys barysynda QR Investıtsııalar jáne damý mınıstri Jeńis Qasymbek «Astana» halyqaralyq qarjy ortalyǵyn qurý boıynsha esep berdi. Onyń aıtýynsha, atalǵan ortalyq kelesi jyldan bastap tolyqqandy jumysisteı bastaıdy .   «GE Oil & Gas» basshysy Lorentso Sımonelı Qazaqstanda ındýstrıaldyq ınternetti keńinen damytýdy usyndy .  Al Eýropalyq qaıta qurý jáne damý bankiniń basshysy Baıqońyrdyń janynda jańa kún elektr stantsııasynyń salynatynyn málimdedi .