Elbasy B.Jylysbaevtyń qaıtys bolýyna baılanysty kóńil aıtý jedelhatyn joldady
ASTANA. QazAqparat - Elbasy Nursultan Nazarbaev belgili ánshi, pedagog Beken Jylysbaevtyń qaıtys bolýyna baılanysty marqumnyń týǵan-týystary men jaqyndaryna kóńil aıtý jedelhatyn joldady, dep habarlaıdy Aqordanyń baspasóz qyzmetinen.
Memleket basshysy aýyr qaıǵyǵa ortaqtasa otyryp, kóńil aıtty. Jedelhatta B.Jylysbaevtyń Uly Otan soǵysynan oralǵannan keıin Almaty memlekettik konservatorııasyn bitirip, búkil eńbek jolyn osy óner ordasymen baılanystyrǵany atap ótilgen. «Ol óziniń janǵa jaǵymdy tenor daýysymen qazaq jáne shetel kompozıtorlarynyń shyǵarmalaryn sheber oryndap, jurtshylyqty án óneriniń nárimen sýsyndata bildi», - delingen jedelhatta. Sondaı-aq B.Jylysbaevtyń konservatorııa professory jáne kafedra meńgerýshisi retinde kóptegen laıyqty izbasarlaryn daıarlaǵany aıtylǵan. Onyń eńbegi joǵary memlekettik nagradalarmen atap ótilip, Qazaq KSR Halyq ártisi qurmetti ataǵy berilgen. Nursultan Nazarbaev ánshiniń shyǵarmashylyq murasy qazaqstandyqtardyń áli talaı býynyn shynaıy ónerdiń shattyǵyna bóleı beretinine senim bildirdi.
