Elbasy Ázerbaıjan Mıllı Májilisiniń tóraǵasy Sagıba Gafarovamen kezdesti

NUR-SULTAN. QazAqparat – Nursultan Nazarbaev Elbasy Ázerbaıjan Respýblıkasy Mıllı Májilisiniń tóraǵasy Sagıba Gafarovamen kezdesti, dep habarlaıdy QazAqparat Elbasynyń resmı saıtyna silteme jasap.

Nursultan Nazarbaev Mıllı Májilis tóraǵasynyń sapary Qazaqstan men Ázerbaıjan arasyndaǵy parlamentaralyq qarym-qatynastyń damýyna tyń serpin beretinine senim bildirdi.

– Túrkistanda Túrkitildes elderdiń Parlamenttik assambleıasynyń onynshy mereıtoılyq otyrysy aıaqtaldy. Jıynnyń tabysty ótkenine senimdimin. Túrkistan qalasyna 2018 jyly oblys ortalyǵy mártebesi berildi. Sodan bergi ýaqytta qala qurylysynda qandaı jetistikke jetkenimizdi ózińiz de kórgen bolarsyz. Bıyl qalada Túrki keńesiniń otyrysyn ótkizý josparlanǵan edi, biraq pandemııaǵa baılanysty jıyn onlaın ótti, – dedi Qazaqstannyń Tuńǵysh Prezıdenti.

Elbasy uzaq jyldar boıy ekijaqty qatynas ornatý men ony tereńdetý jolynda qyzmet etkenine toqtaldy.

– Meniń marqum Geıdar Álıulymen jáne respýblıkanyń qazirgi basshysy Ilham Geıdarulymen jeke qarym-qatynasym árdaıym joǵary deńgeıde. Biz úshin bul dostyqtyń orny bólek, – dedi Nursultan Nazarbaev.

Óz kezeginde Sagıba Gafarova Elbasyǵa qonaqjaı peıili úshin alǵys bildirip, Ázerbaıjan Prezıdenti Ilham Álıevtiń izgi lebizin jetkizdi.

– Men bizdiń halyqtardyń arasyndaǵy qarym-qatynas damyp jatqanyna qýanyshtymyn. Bizdi jaqyndastyratyn dúnıeler kóp, ol: túrki álemi, dástúrimiz, mádenıetimiz. Buǵan Túrkistan qalasyna barǵanda kóz jetkizdim. Qala barshamyzdy tańǵaldyrdy, – dedi S.Gafarova.

Mıllı Májilis tóraǵasy Qazaqstannyń elordasynan alǵan áseri týraly da aıtty.

– Jańadan qala salý úshin saıası erik-jiger ǵana emes, Siz sııaqty óz eliniń patrıotyna tán úlken júrek te kerek, – dedi S.Gafarova.