Elbasy aımaq basshylarymen ne týraly sóılesti – Aıdos Úkibaı mán-jaıdy túsindirdi
«Keshe Qazaqstannyń Tuńǵysh Prezıdenti ákimderdiń bárimen telefon arqyly sóılesti. Qazirgi jaǵdaıǵa baılanysty áńgimeniń negizgi ózegi – tótenshe jaǵdaı kezinde azamattardyń qaýipsizdigin qamtamasyz etý boldy. Nursultan Nazarbaev halyqty qoldaý jumystaryn qyzý júrgizip jatqan volonterler men basqa da azamattardyń densaýlyǵy úshin alańdaýshylyq bildirdi. Aýrýdy juqtyrý qaýpin azaıtý úshin Elbasy volonterlar men áleýmettik qyzmetkerlerdiń jumys formatyn qaıta qaraýdy usyndy», - deıdi Aıdos Úkibaı.
Sonymen qatar áńgime barysynda ákimder Nursultan Nazarbaevqa aımaqtardyń qajet etetin ár turǵynyna áleýmettik kómekti jetkizý maqsatynda qurylǵan «Birgemiz» Qoǵamdyq qorymen jumystyń qalaı júrgizilip jatqanyn baıan etken. Máselen Aqmola oblysynda 3 myńǵa jýyq adam Qor esebinen 50 myń teńge alady.
«Soltústiktegi óńirlerdiń ákimderimen sóılesken kezde Qazaqstannyń Tuńǵysh Prezıdenti sý tasqynyna qarsy is-sharalar men kóktemgi egis naýqanyna basa nazar aýdardy. Atap aıtqanda Nursultan Nazarbaev agrarshylardyń daıyndyǵyna, aýyl sharýashylyǵy tehnıkalarynyń jaı-kúıi jaıly bilgisi keldi. Elbasy agrarshylarǵa senim bildirip, qıyndyqtarǵa qaramastan olarǵa jan-jaqty kómek kórsetiletinin jetkizdi», - deıdi ol.
Aıdos Úkibaı odan bólek Qaýipsizdik Keńesi tóraǵasynyń ońtústiktegi oblystardyń basshylarymen sóılesken kezinde eldiń barlyq óńirine azyq-túlik jetkizýde osy aımaqtardyń róli zor ekenin aıtyp ótkenin jazady. Túrkistan oblysynyń ákimi Ómirzaq Shókeev erte pisetin kókónisterdi keıbir aımaqqa jetkizý jumystary bastalyp ketkenin baıandaǵan. Sonymen qatar Elbasy Túrkistan qalasyndaǵy qurylys jumystarynan habar aldy. Oblys ákimi qurylys alańdarynyń bárinde sanıtarlyq-epıdemıologııalyq talaptar saqtalatynyna sendirip otyr.
«Almaty oblysynyń ákimi Amandyq Batalovpen telefon arqyly sóıleskende Nursultan Nazarbaev almatylyq aport almany jańǵyrtý úrdisi men osy jyly qant qyzylshasyn jınaýdyń ishki ósimi týraly surady. Sondaı-aq Batalov aımaqta taǵy da 23 myń jumys orynyn ashý men Taldyqorgan-Úsharal-Dostyq baǵyty boıynsha avtokólik jolynyń qurylysy týraly baıandady. Aımaq basshylarymen sóılesken kezde Nursultan Nazarbaev memleket óz azamattaryn jan-jaqty qorǵaıtynyn jáne Qazaqstannyń barlyq qıyndyqty eńseretinine senim bildirdi», - deıdi Aıdos Úkibaı.
