Elbasy aýylsharýashylyq ónimderiniń álemdik suranysyna daıyn bolýdy tapsyrdy

ASTANA. QazAqparat - Búgin Úkimettiń keńeıtilgen quramdaǵy otyrysynda Elbasy Nursultan Nazarbaev aýyl sharýashylyǵy salasyna barlyq qajetti qarajatty bólýdi tapsyrdy, dep habarlaıdy QazAqparat.

«Aýyl sharýashylyǵy salasy bolashaqta ekonomıkany damytýdyń negizgi draıveri bolatynyn únemi aıtyp júrmiz. Barlyq elder ózderiniń jerlerin ıgerip boldy. Osy oraıda, tehnologııalyq jetistikterdiń eń joǵary shyńyna shyqty. Endi olar (egistikterinde) budan joǵary óndire almaıdy. Dúnıejúzinde qalǵan jer (ıgerýge bolatyn) Qazaqstan, Reseı, Ýkraınada qaldy», - dep toqtaldy Elbasy.

Osy oraıda Prezıdent eldegi aýyl sharýashylyǵy jerlerin tıimdi paıdalaný qajettigin atap ótti.

«Eger de barlyq elder AQSh-taǵy sekildi azyq-túlikti kóbirek tutynatyn bolsa, álemdegi azyq-túlik 2,5 mlrd adamǵa ǵana jetedi. 2040 jyly Jer betinde 8,9 mlrd halyq bolady. Sondyqtan aýyl sharýashylyǵy ónimderine suranystyń artýyna baılanysty barlyǵy bizge keledi. Osy úrdisterge daıyndalý kerek. Aýyl sharýashylyǵy salasynyń áleýetine jekeleı qaraý qajet. Qansha qarjy kerek bolsa, sony bereıik. Biraq naqty nátıjege qol jetkizý kerek», - dedi Memleket basshysy QR Premer-Mınıstri Baqytjan Saǵyntaevqa qarata aıtqan sózinde.