Elbasy aýyl sharýashylyǵy salasyndaǵy jumystardy synǵa aldy
«Meniń tapsyrmama sáıkes et pen et ónimderin eksportqa baǵyttaý boıynsha keshendi baǵdarlama ázirlendi. 2016 jylǵa qaraı et eksporty 60 myń tonna bolýy kerek edi, buǵan Ulttyq qordan 120 mıllıard teńge bólindi. Al qazir ne bolyp jatyr? Aǵymdaǵy jyldyń 7 aıynda birde-bir et eksporttalǵan joq. Tek Reseıdiń ózi bizden myń tonnaǵa jýyq et alýy kerek edi. Esesine bizdiń sórelerdi belarýs eti jaýlap aldy», - dedi N. Nazarbaev.
Memleket basshysy bul rette belarýs elinde aýyl sharýashylyǵy ónimin sýbsıdııalaý 18 paıyz, al Qazaqstanda 4-5 paıyz ǵana qurap otyrǵanyn atap ótti. Sosyn Prezıdent Kedendik odaqtaǵy biryńǵaı qyzmette ondaı alshaqtyq bolmaýy kerektigin alǵa tartty.
«Sosyn biz azyq-túliktiń turaqtandyrý qorlaryn qurdyq. Alaıda olarǵa bólingen qarajattyń 5 mıllıard teńgesi nemese 40 paıyzy depozıtterde jatyr. Mundaı qorlardyń qyzmetine qaramastan, birqatar áleýmettik taýarlar baǵasy ósip ketken. Sonda bul qordy ne úshin qurdyq? Bul - baǵany tómendetý úshin memlekettiń halyqqa jasap otyrǵan jaqsylyǵy. Al sol máseleniń ózi tıimdi bop turǵan joq», - dedi N. Nazarbaev.
«Jalpy aýyl sharýashylyǵy boıynsha memleketke tıgizgen zalal týraly áńgime kóp. Azyq-túlik korporatsııasy týraly da tergeýler bolyp jatyr. Naqty zań buzýshylyqtar bolsa, sonymen jumys isteý kerek», - dedi Prezıdent.