Elbasy Aýǵanstan prezıdentimen kezdesti

ASTANA. QazAqparat - Qazaqstan Prezıdenti Nursultan Nazarbaev Islam yntymaqtastyǵy uıymynyń ǵylym jáne tehnologııalar jónindegi sammıti aıasynda Aýǵanstan Islam Respýblıkasynyń Prezıdenti Mohammad Ashraf Ǵanımen kezdesti, dep habarlaıdy Aqordanyń baspasóz qyzmeti.

Nursultan Nazarbaev Aýǵanstan Prezıdentine Islam yntymaqtastyǵy uıymynyń ǵylym jáne tehnologııalar jónindegi sammıtine qatysqany úshin rızashylyq bildirdi.

- Joǵary deńgeıdegi kezdesýlerimiz turaqty sıpatqa ıe. Bul ekijaqty qarym-qatynastar qarqyndy damyp kele jatqanyn bildiredi. Qazaqstan kóp beınet kórgen baýyrlas aýǵan halqyna turaqtylyq tileıdi, - dedi Memleket basshysy.

Sondaı-aq, Nursultan Nazarbaev Qazaqstan múmkindigine qaraı Aýǵanstanǵa kómek kórsetip kele jatqanyn aıtty.

- Atap aıtqanda, biz jastarǵa bilim berý, gýmanıtarlyq kómek kórsetý salalarynda qoldaý jasaýdy jalǵastyramyz, - dedi Qazaqstan Prezıdenti.

Aýǵanstan Prezıdenti Sammıtke qatysýǵa shaqyrǵany úshin Nursultan Nazarbaevqa rızashylyq bildirdi.

- Sizdi «EKSPO-2017» halyqaralyq kórmesin jáne Islam yntymaqtastyǵy uıymynyń ǵylym jáne tehnologııalar jónindegi sammıtin tabysty ótkizýińizben quttyqtaımyn, - dedi M.Ǵanı.