Elbasy Atyraý oblysynyń damý məseleleri jóninde keńes ótkizýde
«Men qabyldanǵan baǵdarlamalardyń qalaı júzege asyrylyp jatqanyn tekserip, esep aldym. Halyqpen aralasyp, kóńil-kúılerimen tanystym. Sonyń barlyǵyn aıtqan kezde, jalpy jumys júrip jatyr, baǵdarlamalar oryndalýda. Táýelsizdik jyldary ishinde atqarǵan jumystar kóp. Ony aıtyp júrmin, ózderińiz de bilesizder. Qazaq degen halyq buryn-sońdy bolmaǵan jetistikterge jetti»,- dedi keńesti ashqan Elbasy.
Memleket basshysy búginde Qazaqstandy búkil álem elderi tanyp, syılaıtyndyǵyn, sondyqtan elimiz bitimgershilikpen de shuǵyldanatynyn atap ótti.
«Bizde Dúnıejúzilik dinder kóshbasshylarynyń altynshy sezi óteıin dep jatyr. Nelikten ol bizde ótedi? Tynyshtyq bolǵannan keıin, Qazaqstanǵa senim bolǵannan keıin ótedi. Búkil TMD memleketteriniń arasynda tuńǵysh ret biz BUU Qaýipsizdik keńesiniń múshesi bolyp, ózimizdiń oıymyzdy, pikirimizdi búkil dúnıege pash etkizip jatyrmyz. Men baryp tóraǵalyq jasadym. Ony da bilesizder»,- dep atap ótti Nursultan Nazarbaev.
Osy oraıda Qazaqstan Prezıdenti atalǵan barlyq sharýalardy atqarýda atyraýlyq azamattardyń, otandastarymyzdyń istegen isi qyrýar ekendigin eske saldy. Atyraý Qurmanǵazy, Dına, Mahambet, Murat syndy belgili azamattar dúnıege kelgen óńir ekendigin atap ótti.
