Elbasy Atyraý memlekettik ýnıversıtetiniń Stýdentter úıine bardy

ASTANA. QazAqparat - Memleket basshysy Nursultan Nazarbaev «Bes áleýmettik bastamany» júzege asyrý aıasynda «QazTransOıl» kompanııasy Atyraý memlekettik ýnıversıtetine syıǵa tartqan jańa Stýdentter úıiniń ǵımaratymen tanysty, dep habarlaıdy Aqordanyń baspasóz qyzmeti.

Jataqhanada turatyn stýdenttermen áńgimelesý barysynda Elbasy úlkendi qurmetteýge, kishige qamqor bolýǵa, sondaı-aq óz otanyńdy súıýge negizdelgen qazaq halqynyń salt-dástúrin ustanýdyń mańyzdylyǵyn aıtty.

Ýnıversıtet stýdentteri «Bes áleýmettik bastama» aıasyndaǵy jobalardyń júzege asyrylǵany jáne stýdent jastarǵa árdaıym qoldaý kórsetip kele jatqany úshin Nursultan Nazarbaevqa alǵys aıtty.

Sonymen qatar, Qazaqstan Prezıdentine «Rýhanı jańǵyrý» memlekettik baǵdarlamasynyń jáne «Bes áleýmettik bastamanyń» oblystaǵy iske asyrylý barysy jóninde málimdeldi.

- «Qazaq tilindegi 100 jańa oqýlyq» jobasyn iske asyrý aıasynda oblystyń 18 oqý orny 6 myńnan astam oqýlyqpen qamtamasyz etildi. «Týǵan jer» arnaıy jobasy aıasynda jergilikti metsenattardyń qoldaýymen jalpy quny 9 mıllıard teńge bolatyn 46 joba júzege asyryldy. Sonymen qatar, óńirdiń shyǵarmashylyq ujymdary qazaqtyń mádenıeti men ónerin tanytý maqsatymen álemniń 12 eliniń sahnasynda óner kórsetti. Aımaq kásipkerleriniń qarjysyna Túrkııa astanasy - Ankaranyń ortalyǵyndaǵy Dına Núrpeıisova atyndaǵy alańda belgili otandasymyzdyń bıýsti ornatylady, - dedi Atyraý oblysynyń ákimi N.Noǵaev.

Aıta keteıik, «7-20-25» baǵdarlamasy júzege asyryla bastaǵannan beri óńir turǵyndarynan quny 454 mıllıon teńgeden asatyn 35 ótinish kelip tústi. Olardyń 16-na 181 mıllıon teńge kóleminde jeńildetilgen nesıe berildi. Bıyl oblysta 1792 páterden turatyn 26 turǵyn úı paıdalanýǵa beriledi dep josparlanýda.

Kiris kólemi 25 aılyq eseptik kórsetkish bolatyn 65 myń adamnyń jalaqysy 1,1 mıllıard teńgege ósti.

Bıyl berilgen shaǵyn nesıeniń sany eki ese - 173-ten 366-ǵa deıin ósip, jalpy somasy 1558,9 mıllıon teńge boldy.

2020 jylǵa qaraı oblystaǵy oqý oryndarynyń qajettiligin tolyq qamtamasyz etetin 1960 oryndyq 13 jataqhana salynady.