Elbasy Astananyń 15 jyldyǵyna arnap ázirlengen alyp merekelik tortty kesý rásimine qatysty
ASTANA. 6 shilde. QazAqparat - Búgin Astanada Memleket basshysy Nursultan Nazarbaev Elordanyń 15 jyldyǵy qurmetine arnap ázirlengen merekelik tortty kesý sharasyna qatysty.
Bul týraly Aqordanyń baspasóz qyzmetinen málim etti.
«Han shatyr» saýda, oıyn-saýyq ortalyǵynda ótken saltanatty rásimge sonymen qatar, mektep olımpıadalary men sporttyq jarystardyń júldegerleri, balalar úıleriniń tárbıelenýshileri, oqý ozattary, eldiń barlyq óńirinen kelgen daryndy jáne talantty órender qatysty.
Elordanyń 15 jyldyǵy qurmetine balalar merekelik kontsert ázirlep, onda elimizdiń respýblıkalyq, halyqaralyq baıqaýlar jeńimpazdary, sondaı-aq Reseı, Qytaı, Ózbekstan jáne Qyrǵyzstannyń jas bıshiler ujymdary óner kórsetti.
Іs-sharaǵa qatysýshy jas órenderge arnaǵan sózinde Qazaqstan Prezıdenti Astananyń solarǵa arnap salynǵanyn atap ótti.
- Astana nebári 15 jasqa toldy. Bul qala senderdiń qatarlastaryń deýge bolady, sendermen birge ol ósip-órkendeı beredi. Erjetken soń sender elordamyzdyń qurylysyn jalǵastyrasyńdar, ol budan da kórikti bola túsedi. Qalada jetekshi oqý oryndary, demalys oryndary ornalasqan, aınalasynda «jasyl beldeý» quryldy. Osynyń barlyǵy senderdiń baqytty bolashaqtaryń úshin jasaldy, - dedi Nursultan Nazarbaev.
Sońynan Memleket basshysy barshaǵa tabys, baqyt jáne ıgilik tiledi.
Mereıtoılyq torttyń salmaǵy 600 keliden astam, 4h4 ólshemindegi tórtburyshty pishinde. Onyń jıegine aınaldyra Astananyń kórnekti nysandary men sáýletti oryndarynyń keskinindegi áshekeıler qoıylǵan, al ortasyna bıiktigi 1,2 metrlik «Báıterek» monýmentiniń músini ornatylǵan.
