Elbasy Astanany kórkeıtýge úles qosqan pavlodarlyqtarǵa alǵys bildirdi
«Qurmetti BolatJumabekuly! Sizdi jáne búkil Pavlodar oblysynyń jurtshylyǵyn Astananyń 20 jyldyǵymen shyn júrekten quttyqtaımyn!
Táýelsiz Qazaqstannyń sımvoly sanalatyn bas qalamyzdyń aıtýly mereıtoıy - barsha qazaqstandyqtarǵa ortaq qýanysh.
Saryarqa tósine qazyǵyn qaqqan eńseli elordamyzdy turǵyzýǵa búkil halqymyz jumyla atsalysty.
«Óńirlerdiń Astanaǵa tartýy» jobasy aıasynda Pavlodar oblysy da elordaǵa erekshe syı jasady.
Uzaq qashyqtyqty qamtıtyn jáne tolyq jabdyqtalǵan velosıped jolaǵy adamdarǵa arnalǵan qaladaǵy zamanaýı ortanyń mańyzdy quramdas bóligi sanalady.
Bul velosıped jolaǵy salamatty ómir saltyn nasıhattap, elordada jappaı sportpen shuǵyldaný úrdisin damytýǵa septigin tıgizetin bolady.
Astanany kórkeıtýge zor úles qosqan Sizge jáne óńir turǵyndaryna shynaıy rızashylyǵymdy bildiremin.
Sizderge zor densaýlyq, baq-bereke tileımin!», - delingen Elbasynyń jedelhatynda.
