Elbasy Astanadaǵy Sáýlet jáne qala qurylysy basqarmasynyń halyqqa qyzmet kórsetý sapasyn synǵa aldy
ASTANA. 11 sáýir. QazAqparat - Búgin elordadaǵy Táýelsizdik saraıynda Astanany odan ári damytý boıynsha ótip jatqan keńes barysynda Elbasy Nursultan Nazarbaev Sáýlet jáne qala qurylysy basqarmasynyń halyqqa qyzmet kórsetý sapasyn synǵa aldy.
«Elordadaǵy Halyqqa qyzmet kórsetý ortalyqtaryndaǵy jumys jaqsardy. Byltyr ákimdikpen 200 myńnan astam qyzmet kórsetildi. Elektrondyq qyzmet te jaqsy deńgeıde. Degenmen, qalalyq Sáýlet jáne qala qurylysy basqarmasymen qyzmet kórsetýdiń 85 paıyzy merzimin buza otyryp jasalǵan. Soǵan qosa, bul basqarma óziniń fýnktsııasyn «Qalalyq sáýlet qurylysyna» bergen. Endi sonyń saldarynan halyq álgi kompanııaǵa tólem jasamaı, eshqandaı qujat ala almaıtyn bolypty. Bul máselemen bas sáýletshi aınalysyp, problemany sheshýleri kerek», - dedi Prezıdent.
