Elbasy Astanada saýytty kólikterdi shyǵaratyn zaýytta boldy (FOTO)
Osyndaı joba Orta Azııada alǵash ret júzege asyrylýda jáne joǵarǵy tabysty birlesken kásiporyn qurýǵa, qorǵanys jáne mashına jasaý ónerkásibiniń olqylyqtaryn sapaly qamtamasyz etýge múmkindik beredi. «Qazaqstan Paramaýnt Injınırıng» zaýyty jylyna 120 brondy dońǵalaqty kólik shyǵarýǵa qaýqarly. Zamanaýı joǵarǵy tehnologııalyq tıimdi jabdyqtar birqatar jumystardy atqara alady, atap aıtqanda, metall paraqtaryn lazermen pishý, brondy paraqtardy balqytý, jabyndaryna lak-baıaýlar jaǵý, jınastyrý, sapasyn qatań baqylaýǵa alý sııaqty jumystardy tolyǵymen júzege asyrady. Zaýyttyń tehnıkalyq jabdyqtalýy áskerı jáne azamattyq maqsattaǵy dońǵalaqty tehnıkalardy óndirý aýqymyndaǵy mindetterdi keńinen sheshedi dep kútilýde. Zaýyttaǵy qurastyrý bólimderi men qyzmet kórsetý ortalyqtary tapsyrys berýshilerdiń talaptaryna sáıkes mashınalardy ári qaraı jańa úlgilerin ázirleýge jáne jańǵyrtýǵa, tehnıkalyq qamtamasyz etýge yqpal etedi. Zaýyttan óndiriletin barlyq tehnıka halyqaralyq standart negizinde jasalatyndyqtan, ónimdi Qazaqstannyń ózinde de, sonymen qatar shetelde de aınalymǵa jiberýge bolady. Qazaqstandaǵy óndiriske usynylyp otyrǵan brondy dońǵalaqty mashına barlyq kórsetkishteri boıynsha úzdikterdiń biri bolady dep joramaldanyp otyr. Sonymen qatar kásiporynda 150 jumys orny qurylyp, 55 ınjener men tehnıka salasyndaǵy mamandar Qazaqstanda jáne shetelde oqytyldy. Osy jobaǵa qatysýshylar «Qazaqstan ınjınırıng» Ulttyq kompanııasy» AQ, «Qazaqstan ınjınırıng Dıstrıbıýshn» JShS jáne «Paramaýnt grýpp» kompanııasy (OAR) bolyp tabylady. Aıta keteıik, «Paramount Group» Ońtústik Afrıkadaǵy iri jeke áýe ǵaryshtyq jáne qorǵanys, sonymen qatar ǵalamdyq qorǵanys, bitimgershilik kúshter men ishki qaýipsizdik úshin tolyǵymen yqpaldasýyǵa daıyn sheshimdermen qamtamasyz etýshi kompanııa bolyp sanalady.
