Elbasy Astana jáne Qazaqstan mıtropolıti Aleksandrdy qabyldady
Kezdesýde Elbasy mıtropolıt Aleksandrdyń Qazaqstandaǵy qyzmetine joǵary baǵa berip, din salasyndaǵy memlekettik saıasat máselelerine toqtaldy.
«Sizdiń Qazaqstanda atqaryp jatqan qyzmetińizdi joǵary baǵalaımyz. Siz beıbitshilik pen konfessııaaralyq kelisim saıasatyn júrgizip otyrsyz. Bizdiń elimiz - zaıyrly memleket. Barlyq dinı konfessııalardyń teńdigi men din ustaný bostandyǵy Konstıtýtsııada jáne ózge de zańdarda bekitilgen. Biz dinı qyzmet týraly zańnamaǵa ózgerister engizý jóninde bastama jasadyq. Siz oǵan belsendi túrde atsalystyńyz. Atqarǵan jumysyńyz úshin Sizge rızashylyq bildiremiz», - dedi Qazaqstan Prezıdenti.
Sondaı-aq, Memleket basshysy Astana jáne Qazaqstan mıtropolıtin ótken Rojdestvo merekesimen quttyqtady.
Mıtropolıt Aleksandr Nursultan Nazarbaevqa qabyldaǵany úshin alǵys aıtyp, Qazaqstan Prezıdentiniń «Bolashaqqa baǵdar: rýhanı jańǵyrý» atty maqalasynyń rýhanı-adamgershilik tárbıe berý isindegi mańyzdylyǵyn atap ótti.
«Sizdiń tulǵany rýhanı-adamgershilik turǵydan tárbıeleý jónindegi strategııańyz Qazaqstandy odan ári damytýdyń negiz qalaýshy qujaty bolyp sanalady. «Bolashaqqa baǵdar: rýhanı jańǵyrý» atty maqala qoǵamymyzdyń ári qaraı órkendeýine qajetti dúnıelerge jol ashady», - dedi Astana jáne Qazaqstan mıtropolıti.
