Elbasy Astana velokomandasynyń negizgi quramymen jáne QR velosport federatsııasynyń basshylyǵymen kezdesti

Kezdesý barysynda atalǵan federatsııanyń basshysy Qaırat Kelimbetov, sportshylar jáne komandanyń menedjmenti Elbasyn 2011 jylǵa arnalǵan josparlarmen tanystyryp, komandanyń jańa brendınginiń tusaýkeserin jasady. Komandanyń jańa kıim úlgilerinde kún shuǵylasyndaǵy qyrannyń sýreti beınelengen. 2011 jylǵy maýsymda Astana velokomandasy jarys jolyna jańarǵan toppen shyǵady. Qurama sapy 10 jańa sportshymen tolyqty.

Aıta keteıik, veloshabandozdyń bas kıimine uqsatyp salynǵan erekshe ári álemdegi eń myqty sporttyq keshenderdiń biri - respýblıkalyq velotrek. Ol halyqaralyq uıymdardyń aýdıtinen ótip, sarapshylar tarapynan joǵary baǵa alǵan bolatyn. Onda velotrek, 25 metrlik basseın, sporttyń barlyq túrleri úshin ámbebap zal, fıtnes-klýb, 100 adamǵa arnalǵan qonaq úı, meıramhana bar.

Sondaı-aq atalǵan qurylysqa 2009 jyly ózgerister engizilip, jobaǵa muz aıdyny qosylǵan bolatyn. Onda 2011 jyly elordada ótetin 7-shi qysqy Azıada oıyndary barysynda mánerlep syrǵanaýdan jarystar ótkiziledi.