Elbasy: Astana - Otanymyzdyń júregi, táýelsizdigimizdiń tiregi
ASTANA. QazAqparat - Saryarqanyń saıyn dalasynda Otanymyzdyń jańa elordasy, órkendeý ústindegi Qazaqstannyń ortalyǵy - Astana boı túzedi. Jańa elorda salý bastamasyn alǵash Qazaqstan Prezıdenti kótergeni barshaǵa málim. Ol kezde, toqsanynshy jyldar ortasynda bul ıdeıa júzege asatynyna sengender kóp bolǵan joq. Jańa qala salý men oǵan kóshý kóptegen onjyldyqtarǵa sozylady dep sanaǵandar da boldy. Biraq olardyń bári qatelesken edi. Astana eń qysqa merzim ishinde salynyp, búkil elimizdiń qaryshty damýynyń nyshanyna, mıllıon turǵyny bar iri shaharǵa aınaldy, dep jazady Aqordanyń baspasóz qyzmeti Feısbýktegi paraqshasynda.
Qalanyń bas sáýletkeri shyn máninde Memleket basshysy Nursultan Nazarbaev bolyp sanalady. Onyń ıdeıasy men usynystarynyń arqasynda Astana Batys pen Shyǵys mádenıeti men dástúrin toǵystyrǵan kóz tartar biregeı kelbetke ıe boldy. Qalanyń kóptegen ǵımarattary, eskertkishteri kezinde Prezıdent sýret, syzba jáne nobaı túrinde túsirgen oılardan alyndy. Álemniń belgili sáýletkerleri Nursultan Nazarbaevtyń oılaryn ómirde júzege asyra bildi. Olardyń arasynda Kıse Kýrokava, ser Normann Foster, Kenzo Tange jáne taǵy basqalar bar. Ǵımarattardyń basym kópshiligi Astananyń eń kórneki oryndary men qalanyń ózindik rámizderine aınaldy.
Memleket basshysynyń syzbasy boıynsha «Báıterek» - Astananyń jáne búkil eldiń eń tanymal brendi boı kóterdi. Ol elordanyń jańa bóliginiń dál orta tusynda ornalasqan. Onyń basynan búkil qalanyń ásem kórinisi kózge shalynady. Sonymen qatar, Qazaqstan Prezıdentiniń sýreti men syzbasy negizinde «Han Shatyr» biregeı saýda jáne oıyn-saýyq kesheni salyndy. Arnaýly polımerlik jabynnan jasalǵan keshen Forbes Style jýrnaly nusqasy boıynsha, álemdegi eń úzdik on ekoǵımarat qataryna endi. Dúkender men pavılondarǵa qosa, munda kınoteatr, kóptegen attraktsıondar, sulýlyq salondary, tipti akvapark ta bar. Memleket basshysy oılastyrǵan taǵy bir mańyzdy nysan - «Otan qorǵaýshylar» monýmenti.
Álemdik jáne dástúrli dinder kóshbasshylarynyń sezin ótkizý úshin Nursultan Nazarbaev pıramıda túrinde arnaıy saraı salýdy usyndy. Bul ıdeıany Norman Foster tabysty júzege asyrdy. Búginde Beıbitshilik jáne kelisim saraıy - Astananyń sáýlettik ansambliniń bólinbes bólshegi. Prezıdent mádenıet ortalyǵy, Aqorda rezıdentsııasy jáne Astananyń ózge de sáýletti ǵımarattary da aldymen Nursultan Nazarbaev syzǵan joba túrinde paıda bolǵan edi.
Memleket basshysy - Astana qurylysyna tikeleı qatysýshy. Prezıdent jumystardyń qarqynyn, eń bastysy - sapasyn únemi qadaǵalap otyrady. Muny barlyq sáýletkerler men ınjenerler, Astana prorabtary men qurylysshylary udaıy este ustap, memleket basshysyn jáne elorda turǵyndaryn uıatqa qaldyrmaýǵa tyrysady.
Eýropadan Azııaǵa aparatyn joldar qıylysynda qolaıly ornalasýy elimizdiń astanasyn eýrazııalyq keńistiktiń jańa ortalyǵyna aınaldyrdy. Búginde Astana aýmaqty óńirdiń eń ásem qalasyna, onyń saıası, ekonomıkalyq, mádenı jáne rýhanı ortalyǵyna aınaldy.
Prezıdent Astana týraly
Astana - Otanymyzdyń júregi, táýelsizdigimizdiń tiregi.
***
Jańa Astana - táýelsiz Qazaqstan úshin jarqyn keleshektiń nyshany.
***
Astana - memleket dıdary, halyq mereıi. Onyń biz jetpek bıikterdeı óreli, biz ornatpaq qoǵamdaı tartymdy bolyp kórkeıip ósýi jolynda kúsh-jigerdi aıamaımyz. Bizdiń jańa astanany, jańa Astananyń bizdi uıatqa qaldyrmaıtynyna nyq senimdimiz.
***
Astanany tek memleket basshylary ǵana qurmaıdy, astana da el basshylyǵyn qalyptastyrady.
***
Astana kelbeti - ult kelbeti.
***
Jańa astananyń qalasy da, adamdardyń sanasy da jańa bolsyn.
