Elbasy Astana mańynda orman otyrǵyzý isimen aınalysyp júrgen ǵalymdar men ormanshylarǵa alǵysyn aıtty
ASTANA. QazAqparat - Astana mańynda sońǵy 17 jylda jaıqalyp ósip kele jatqan ormanda janýarlardyń qarasy qalyńdap keledi. Bul týraly búgin Elbasy Nursultan Nazarbaev Astananyń «jasyl beldeýin» quraıtyn orman alqabyn aralap shyqqannan keıin BAQ ókilderine bergen suhbatynda málim etti.
«Astana mańyna joq bolyp ketken janýarlar qaıtadan kelip jatyr. Baıaǵyda tyń jerlerdi ıgeremiz dep jerdiń basym bóligin jyrtyp tastaǵannan keıin qoıandar, elikter, qyrǵaýyldar joq boldy. Qazir qaıtadan qalpyna kelip jatyr. Ormannyń ishinde jemis-jıdekter de otyrǵyzylýda. Osy jumystardyń barlyǵy halyqtyń ıgiligi úshin. Búginde reseılik jáne basqa da elderdiń orman salasyndaǵy ǵalymdary elorda tóńiregindegi «jasyl beldeýdi» keremet qubylysqa baǵalaýda. Sebebi, en dalada osyndaı alyp ormandy otyrǵyzý bolǵan emes», - dedi Prezıdent.
N.Nazarbaev orman qalanyń tóńireginde 70 myń gektarǵa jetkenin, al 2020 jylǵa deıin ony 100 myń gektarǵa jetkizý maqsat etip qoıylǵandyǵyn atap ótti.
Elbasy Astana kúni qarsańynda dástúrli túrde jyl saıyn «jasyl beldeý» ormandaryn aralaıtyndyǵyn aıta kele, «Jasyl el» baǵdarlamasymen jyl saıyn barsha Qazaqstan jastaryna «árqaısysyń aǵash otyrǵyzyńdar» dep uran tastap kelemin. Jalpy, elimizdiń barlyq jerine aǵash otyrǵyzýǵa bolady»,- dedi.
Sonymen qatar Memleket basshysy elorda mańynda orman otyrǵyzý isimen aınalysyp júrgen ormanshylarǵa, ǵalymdarǵa, jumysshylarǵa óz alǵysyn bildirdi.
Taratylǵan málimetterge qaraǵanda, bul aýmaqta 2020 jylǵa deıin úsh negizgi baǵyt boıynsha jumys júrgizý josparlanýda. Birinshi, ormandy alqapta egý jumystaryn jalǵastyrý. Ekinshi baǵyt - qala aýmaǵyndaǵy bos jerlerde orman alqaptaryn jasaý. Sonymen qatar EKSPO-2017 kórmesine daıyndyq aıasynda elordanyń jasyl beldeýin damytý úshin rekreatsııalyq aýmaqtardy jasaý kózdelgen, bul atalǵan jumystyń úshinshi baǵyty bolyp tabylady. Qazirgi kezde osy aýmaqty jasaýǵa arnalǵan tehnıkalyq-ekonomıkalyq negizdeme ázirlendi. Osy oraıda 25 gektar aýmaqty quraıtyn alǵashqy jobada sport kesheni, balalardyń oıyn alańdary, meıramhana, 320 kólikke arnalǵan avtoturaq qurylysy qarastyrylǵan. Al 100 gektar quraıtyn ekinshi aýmaqta at sporty keshenin ornalastyrý josparlanýda. Onda otbasylyq demalys ortalyǵy, akvapark, 288 oryndyq balalar lageri, jastar demalys ortalyǵy bolady.
