Elbasy «Astana Group» kompanııalar tobynyń prezıdentin qabyldady
Kezdesý barysynda Memleket basshysyna otandyq avtomobıl ónerkásibin odan ári damytýǵa baılanysty tapsyrmalardyń oryndalýy jóninde málimet berildi.
Nurlan Smaǵulov Nursultan Nazarbaevqa «Astana Motors» kompanııasynyń Almaty qalasynda «Hyundai» jeńil kóligin jasaý zaýytynyń qurylysyn bastaǵany jóninde baıandady.
«Kásiporynnyń qýaty alǵashqy kezeńde 30 myń avtomobıl shyǵarýǵa jetedi. Al, kelesi kezeńde óndiris kólemi jylyna 45 myńǵa deıin artatyn bolady. Sonyń arqasynda Qazaqstan naryǵyn sapaly ári qoljetimdi «Hyundai» markaly jeńil avtomobılimen qamtamasyz etýge, sondaı-aq kólikti TMD elderine eksporttaýǵa jol ashylady. Jobaǵa bólingen ınvestıtsııanyń jalpy kólemi - 25 mıllıard teńge. Buǵan óz qarajatymyzdan bólek kommertsııalyq talaptarǵa saı zaemdik qarjy tartylmaq. Zaýyt 700 jańa jumys ornyn ashýǵa múmkindik beredi», - dedi Nurlan Smaǵulov.
Kezdesý sońynda Nurlan Smaǵulov Memleket basshysyna Qazaqstan bıznesine turaqty qoldaý kórsetip kele jatqany jáne «7-20-25» ıpotekalyq turǵyn úı baǵdarlamasy sııaqty kólik salasyna nesıe bólý baǵdarlamasy jóninde sheshim qabyldaǵany úshin alǵys aıtty.
