Elbasy aspan asty elindegi aýqymdy is-sharaǵa qatysty
ASTANA. QazAqparat - Búkil álem Qytaı Halyq Respýblıkasynyń astanasyna kóz tigip otyr. Beıjinde ótip jatqan «Bir beldeý, bir jol» atty halyqaralyq yntymaqtastyq forýmyna dúnıe júziniń jıyrmadan astam memleketiniń basshylary qatysýda.
Memleket basshysy Nursultan Nazarbaev forým aıasynda uıymdastyrylǵan «Tyǵyz yntymaqtastyqqa arnalǵan saıası birlesken qyzmet» atty «dóńgelek ústel» jıynyna qatysýshylar aldynda sóz sóıledi. Elbasy Qytaı Halyq Respýblıkasynyń Tóraǵasy Sı Tszınpınniń Eýrazııada ejelgi Jibek jolyn jańa, zamanaýı formatta qaıta jandandyrý ıdeıasy álemde beleń alyp kele jatqan saıası, ekonomıkalyq jáne gýmanıtarlyq daǵdarystarǵa berilgen ýaqtyly jaýap ekenin atap ótti. «Paternalızm men saıası astary bar sanktsııalardy qoldaný sharalary mıllıondaǵan adamdardyń ekonomıkalyq belsendiligin tómendetip, ómir súrý deńgeıine áser etti. Sonyń nátıjesinde, sońǵy jyldary álemdik ekonomıka men saýdada bosańdyq pen quldyraý baıqala bastady. Osyndaı jaǵdaıda halyqaralyq kooperatsııany yntalandyrý úshin álem jańa jetekshi kúshtiń qajettiligin ótkir sezinýde», - dedi Nursultan Nazarbaev.
Qazaqstan Prezıdenti «Bir beldeý, bir jol» bastamasy jańa geoekonomıkalyq paradıgma qalyptastyrýǵa múmkindik beretinin atap ótti. «Onyń tabysty iske asýy, jınaqtap alǵanda, 4,4 mlrd adam turǵyndy qamtıtyn elderge paıda ákeletinin» tujyrymdaǵan Elbasy «Bir beldeý, bir jol» óńirlik kooperatsııasynyń jańa modeliniń artyqshylyqtaryna erekshe toqtaldy.
- «Birlese damý arqyly turaqtylyqqa qol jetkizý» ustanymy búginde ondaǵan eldiń ekonomıkalyq múddesine saı keletin halyqaralyq yntymaqtastyqtyń tartymdy formasy bolyp sanalady. Osyǵan oraı, Jibek jolynyń naqty sulbasy kórine bastaǵan qazirgi kezde bul makroóńirlik kooperatsııanyń birlesken strategııalyq úılesimi qajet. Sondaı-aq, Jibek joly bastamasyn iske asyrý tutas bir óńirlerdi, sonyń ishinde Ortalyq Azııany jahandyq kontekste jańa turpatta tanytýǵa múmkindik beredi, - dedi ol.
Sondaı-aq, qazaq basshysy «Ortalyq Azııa álemniń eń iri naryqtary arasyndaǵy basty dánekerge aınalyp, qaıtadan strategııalyq mańyzǵa ıe bolǵanyn» atap ótip, «Eýrazııalyq Ekonomıkalyq Odaqtyń osy protsestegi mańyzdy róline» toqtaldy. «Úlken Eýrazııanyń» birtutas ekonomıkalyq keńistigin qurý ıdeıasy jańa mánge ıe bolýda. Jibek jolynyń ekonomıkalyq beldeýi Shanhaı yntymaqtastyq uıymy, Eýrazııalyq ekonomıkalyq odaq jáne Eýropalyq odaq platformalaryn órkendeýdiń birtutas óńirlik aýmaǵyna utymdy túrde toǵystyra alady», - dedi Qazaqstan Prezıdenti.
Nursultan Nazarbaev «Bir beldeý, bir jol» bastamasyn iske asyrý aıasynda birqatar naqty usynystaryn ortaǵa saldy. «Jibek joly ekonomıkalyq beldeýiniń tranzıttik áleýetin tıimdi ıgerý úshin qyzmet kórsetý deńgeıin jaqsartyp, ákimshilik kedergilerdi joıý arqyly taýar aǵynyn ótkizýdi birte-birte jeńildetý qajet. Qazaqstan bul másele boıynsha naqty sharalar qabyldaýda. Ol saraptama men tıisti qarjylandyrýdy talap etedi. Azııa ınfraqurylymdyq ınvestıtsııalar banki osyndaı baǵdarlamalardy belsendi túrde qarjylandyrý kerek dep esepteımin. Bul - bolashaqqa arnalǵan ınvestıtsııa», - degen Elbasy budan bólek, «Jańa Jibek joly boıynda ornalasqan elderdiń azyq-túlik qaýipsizdigin qamtamasyz etý maqsatymen aýyl sharýashylyǵy kooperatsııasyn damytýdyń mańyzdylyǵyna da erekshe mán berdi. Osy maqsatta «ınnovatsııalyq jáne ǵylymı-tehnıkalyq damý salasyndaǵy yntymaqtastyqty tereńdetýdi» usyndy.
- Jobalardy birlese qarjylandyrý, ǵylymı-zertteý jáne tájirıbelik-konstrýktorlyq jumystar men tehnologııalar transferti ortalyqtaryn, ınnovatsııalyq kompanııalardy, venchýrlyq qorlardy qurý máselelerin qarastyrǵan durys. Osy oraıda, qazaqstandyq ǵalymdardyń Jibek jolynyń Halyqaralyq ǵylym akademııasyn qurý jónindegi usynysyna nazar aýdarǵym keledi. Sonymen birge, qorshaǵan ortanyń, sonyń ishinde kólik arterııalary bola alatyn ishki kontınentaldy transshekaralyq ózenderdiń sý resýrstaryn tıimdi basqarý máselelesin de nazardan tys qaldyrmaǵan jón, - dedi Qazaqstan Prezıdenti.
Sóz sońynda Nursultan Nazarbaev «Bir beldeý, bir jol» ıdeıasyn oıdaǵydaı júzege asyrý úshin múddeli elder arasynda ózara senimniń ornyǵýy, olardyń teń quqyqtylyqqa jáne jan-jaqty yntymaqtastyqqa daıyn bolýy mańyzdy» ekenin atap ótti.
