Elbasy arqasynda júzege asqan saıası oqıǵanyń biri - Qazaqstan parlamentarızm ınstıtýty - Májilis spıkeri N. Nyǵmatýlın
ASTANA. 28 qarasha. QazAqparat - Elbasy arqasynda júzege asqan saıası oqıǵanyń biri - Qazaqstanda parlamentarızm ınstıtýtyn qalyptastyrý.
Búgin Astanada ótip jatqan «Qazaqstan Respýblıkasynyń Tuńǵysh Prezıdenti - Elbasy N. Nazarbaevtyń Qazaqstanda parlamentarızmniń qalyptasýyndaǵy róli» atty konferentsııa barysynda Májilis tóraǵasy Nurlan Nyǵmatýlın osylaı málim etti.
«Endi eki kúnnen keıin Qazaqstanda alǵash ret Tuńǵysh Prezıdent kúni merekesi atalyp ótiledi. Bul mereke elim, jerim deıtin árbir azamat úshin mańyzy zor, maǵynasy da tereń meıram. Sebebi Tuńǵysh Prezıdent - Elbasy N. Nazarbaevtyń tarıhı eren eńbegi arqasynda álemde jańa el - Táýelsiz Qazaqstan memleketi quryldy. Elbasynyń salıqaly saıasatynyń, danalyǵy men iskerliginiń nátıjesinde Qazaqstandy búgin álem tanıdy», - dedi Májilis spıkeri.
Sonymen qatar, N. Nyǵmatýlın Elbasynyń osy jyldar ishinde álem nazaryn aýdarǵan túbegeıli reformalardy júzege asyrǵanyn, úlken jeńisteri arqyly halyqaralyq saıası jáne tarıhı tulǵaǵa aınalǵanyn atap ótti.
«Elbasymyz jasaǵan saıası oqıǵanyń biri - Qazaqstanda parlamentarızm ınstıtýtyn qalyptastyrý. Barshaǵa belgili bizdiń kásibı parlamenttiń tarıhy bastalǵan sonaý 90-shy jyldary elimiz úshin eń aýyr, eń jaýapty kezeń bolatyn. Osy ýaqytta Qazaqstan Táýelsizdigin alyp, odan ári derbes memleket retinde damýdyń qıyn belesterinen ótti. Tek Tuńǵysh Prezıdenttiń batyl qadamdarynyń arqasynda ǵana áleýmettik-ekonomıkalyq saıası bastamalaryn sapaly zańmen bekitetin Parlament óz jumysyn bastady», - dedi N. Nyǵmatýlın.
Sonymen qatar, spıker 1995 jyly tamyzda elimizde jalpyhalyqtyq referendým ótkenin, nátıjesinde Ata zań qabyldanǵanyn aıtty. Onyń sózine qaraǵanda, tikeleı Elbasynyń basshylyǵymen ázirlengen Konstıtýtsııa Qazaqstannyń kelbetin tolyqtaı ózgertken, azııalyq qasıetterdi, eýropalyq dástúrlerdi, batystyń demokratııasyn biriktirgen zańdy qujat bolyp tabylady.
«Bizdiń qos palataly Parlament osy Konstıtýtsııa negizinde ashyq pikirler men jarııa saıasattyń bıik minberi ǵana emes, múmkindigi mol, qýatty, myqty, mańyzdy memlekettik ınstıtýt retinde qalyptasty», - dedi N. Nyǵmatýlın.
