Elbasy árqashanda halqymen birge ekenin kórsetip keledi – Májilis tóraǵasy
«Búgin barsha respýblıkalyq aqparat quraldarynda Tuńǵysh Prezıdenttiń arnaıy úndeýi jarııalandy. Bul úndeý Elbasy Nursultan Ábishuly Nazarbaevtyń árqashanda halqymen birge ekenin kórsetip, halqymyzdyń yntymaǵyn odan ári nyǵaıtýǵa serpin beredi. Sebebi Elbasynyń kóregen saıasatynyń arqasynda Táýelsizdik jyldary birligimiz artyp, elimizde iri saıası, ekonomıkalyq, áleýmettik reformalar jasalyp, Qazaqstanymyz barlyq salada zor tabystarǵa jetti», - dedi N. Nyǵmatýlın Májilistiń jalpy otyrysynda.
Sonymen qatar ol elimizdiń halqy kómekpen qamtylatynyn atap ótti.
«Sonymen birge, bolashaqqa arnalǵan Ulttyq qorymyz da bar. Bul qazirgi kúrdeli kezeńde halqymyzdy, árbir azamatty jan-jaqty qoldaýǵa múmkindik berip otyr. Biz birlikti, kelisimdi, turaqtylyqty saqtap, ýaqytsha qıyndyqtan aman-esen shyǵatyn bolamyz», - dedi Májilis tóraǵasy.
Nurlan Nyǵmatýlın Táýelsizdiktiń alǵashqy kúnderinen bastap damýdyń negizgi kezeńderinen ótkenin eske sala otyryp, Elbasynyń kúsh-jigeriniń arqasynda memleketimizde bolashaqqa qajetti qor jınaqtalǵanyna toqtaldy. Olar - Ulttyq qor, damyǵan ekonomıka, ınfraqurylym jáne áleýmettik reformalar.
Májilis tóraǵasynyń pikirinshe, qazir biz jaýapkershilikti arttyryp, elimizdiń ıgiligi úshin, ásirese muqtaj jandarǵa qoldaý kórsetý úshin barlyq múmkindikti paıdalanýmyz óte mańyzdy.
«Halqymyzdyń tózimdiligi, erik-jigeri jáne ózine degen zor senimi arqasynda mindetti túrde jeńip shyǵamyz, - dep Elbasy aıtqandaı, qazaqstandyqtar qazirgi kúrdeli jaǵdaıdy da jeńe alatynyna eshqandaı kúmán joq. Elbasy atap ótkendeı, birde-bir adam, elimizdiń eshbir azamaty qamqorlyqsyz qalmaýy mańyzdy. Biz, Parlament depýtattary qazaqstandyqtardy qazirgi qaýip-qaterden qorǵaý úshin, eń aldymen, áleýmettik mańyzy bar zań jobalaryna kúsh-jigerimizdi jumsaımyz», - dep túıindedi Nurlan Nyǵmatýlın.
Aıta keteıik, QR Tuńǵysh Prezıdenti – Elbasy Nursultan Nazarbaevtyń «Birlese bilgen el bárin jeńedi» atty maqalasy jarııalandy.
«Qazaqstan qaýipti derttiń aldyn alýǵa álem elderiniń eń alǵashqylarynyń biri bolyp kiristi. Tıisti saqtandyrý sharalary jasaldy. Memlekettik organdar arnaýly daıyndyqtan ótkizildi. Ózge elderde vırýs qalaı paıda bolyp, pandemııa qalaı órbip, órshigeni baqylandy. Sonyń nátıjesinde indettiń etek alyp ketýine múmkindiginshe jol berilmeı, ahýal kún saıyn turaqty nazarda ustalyp otyr. Jaǵdaıdy ońaltý úshin kóp jumys isteldi, áli de talaı sharýa atqarylatyn bolady. Igi maqsattaǵy is-sharalardyń bárine jer-jerlerde búkil halyq bolyp qoldaý kórsetkenimiz jón», - dedi Elbasy.