Elbasy: Árbir otbasynyń tarıhy - Qazaqstan turmysynyń úlken entsıklopedııasy
ASTANA. QazAqparat - Elbasy Nursultan Nazarbaev «Mereıli otbasy» Ulttyq baıqaýynyń jeńimpazdaryn marapattaý rásimine qatysty. Bul týraly Aqordanyń baspasóz qyzmetinen habarlady.
Óz sózinde Memleket basshysy «Qazaqstan-2050» Strategııasynda bıik maqsat - álemdegi eń damyǵan 30 eldiń qataryna kirý mindeti qoıylǵandyǵyna toqtaldy.
- HHI ǵasyrdyń ortasynda otbasylarynyń basym kópshiligi tynyshtyq pen molshylyqta ómir súretin el ǵana eń damyǵan memleket qatarynda bolady. Balalardy tárbıelep, olarǵa sapaly bilim beredi, aǵa býynǵa qamqorlyq kórsetedi, salamatty ómir saltymen júredi, - dedi Nursultan Nazarbaev.
Qazaqstan Prezıdenti otbasylyq qatynastardy, moraldyq-etıkalyq jáne rýhanı adamgershilik qundylyqtardy nyǵaıtýdyń 2015-2020 jyldarǵa arnalǵan Jalpyulttyq is-sharalar josparyn ázirleýdi tapsyrdy.
Memleket basshysy osynaý mańyzdy jumystyń basty ortalyǵy Prezıdent janyndaǵy Áıelder isi jáne otbasylyq-demografııalyq saıasat jónindegi Ulttyq komıssııa bolýy tıistigine toqtala otyryp, onyń quramyn kúsheıtý jáne jumysyna azamattyq qoǵamnyń bedeldi ókilderin tartý qajettigin aıtty.
Sonymen qatar, Qazaqstan Prezıdenti egde adamdardy jasyna qaraı kemsitýden qorǵaý úshin zańnamalyq bazany ári qaraı jetildirýdiń, sondaı-aq jetim balalardy asyrap alǵan jáne tárbıeleıtin azamattarǵa qolaıly quqyqtyq ahýal jasaýdyń mańyzdylyǵyna nazar aýdardy.
Nursultan Nazarbaev otbasyn, ana men balany qoldaý, adamdardyń qarttyǵyn laıyqty qamtamasyz etý jónindegi ınfraqurylymdy josparly túrde damytýdyń mańyzdylyǵyn da atap ótti.
- Birinshi kezekte, qoǵamdyq negizde Bala quqyǵy jónindegi ýákiletti ınstıtýt qurý máselesin pysyqtaýdy tapsyramyn. Jetim jáne qamqorshysyz qalǵan balalardyń biryńǵaı jalpyulttyq derek qoryn qalyptastyrý kerek. Memleket pen jeke menshiktiń seriktestigi negizinde jumys isteıtin, jas otbasylarǵa, jalǵyzbasty analarǵa, balalarǵa, qarttarǵa jan-jaqty kómektesetin ınstıtýttar jelisin damytqan jón, - dedi Qazaqstan Prezıdenti.
Memleket basshysy otbasylyq ar-ujdan qundylyqtaryn nyǵaıtý jónindegi aqparattyq jumystardy kúsheıtip, yntymaǵy myǵym, tatý otbasylardyń úlgisin keńinen kórsetýdiń qajettigin aıtty.
Qazaqstan Prezıdenti birinshi ret ótkizilip otyrǵan, 15 etnostyń otbasylary men 34 aralas otbasy qatysqan «Mereıli otbasy» baıqaýynyń mańyzdylyǵyn atap ótti.
- Árbir otbasynyń tarıhy, bul - Qazaqstan turmysynyń úlken entsıklopedııasy. Eń laıyqty jáne qurmetti otbasylar óńirlik baıqaýlardyń jeńimpazy boldy. Osy otbasylardyń árqaısysy týraly roman, povest jazyp, fılm túsirýge bolady, - dedi Memleket basshysy.
Marapattaý rásiminde Elbasy Bımahanbetovter otbasyna dıplom jáne otandyq óndiristen shyqqan ámbebap shaǵyn avtobýstyń kiltin tapsyrdy jáne qalǵan 15 otbasy da avtokólikterge ıe bolatynyn aıtty.
Nursultan Nazarbaev jeńimpazdardy quttyqtady jáne Qazaqstannyń barlyq otbasylaryna densaýlyq, baq-bereke tiledi.
Marapattaý rásimi Qazaqstannyń estrada juldyzdarynyń qatysýymen ótken merekelik kontsertpen aıaqtaldy.
Baıqaýǵa Qazaqstannyń barlyq óńirlerinen jalpy sany 1298 otbasy qatysty. Al aqtyq márege sms jáne ınternet-daýys berý arqyly óńirlik týrlar qorytyndysy boıynsha 16 úmitker-otbasy shyqty.
Jyl saıynǵy «Mereıli otbasy» Ulttyq baıqaýy adamgershilik qundylyqtardy jáne neke men otbasynyń jaǵymdy obrazyn qalyptastyrý, otbasy mártebesin kóterý maqsatynda Memleket basshysynyń Ókimimen bekitilgen.
