Elbasy «Altyntaý» dep atyn qoıǵan kenishti ıgerý ındýstrııalyq ozyq joba sanalady - respýblıkalyq basylymdarǵa sholý

***

Elbasy «Altyntaý» dep atyn qoıǵan kenishti ıgerý ındýstrııalyq ozyq joba sanalady. Osy taqyryppen «Egemen Qazaqstan» gazetiniń senbilik sanyndaǵy maqalada Memleket basshysy N.Nazarbaevtyń jumys babyndaǵy saparmen «Vasılkovskıı KBK» AQ-yna barǵandyǵy jaıynda baıandalǵan. Elbasy kombınat jumysshylarymen kezdesýi barysynda elimizde ındýstrııalyq-ınnovatsııalyq baǵdarlamamen 144 jańa óndiris orny salynatyndyǵyn, onyń 72-si bıylǵy birinshi jarty jyldyqta iske qosylatyndyǵyn atap ótken. Sonymen qatar Aqmola oblysynda osyndaı 12 joba arnaıy baqylaýǵa alynǵandyǵyn aıtqan. Jarııalanymda N.Nazarbaevtyń «álemdi qursaǵan ekonomıkalyq daǵdarys azýly memleketterdiń ózin teńseltip turǵan kezeńde biz jańa kásiporyndar salyp jatyrmyz. Astanalyq Aqmola oblysynda búgin shyn mánindegi «altyn zaýyt» paıdalanýǵa berildi. Bul kóp ultty halqymyzdyń yntymaq-berekesiniń, baýyrmaldyǵy men beıbitshilik súıgish keń júreginiń, tózimdiligi men tabandylyǵynyń arqasynda múmkin bolyp otyr. Barshańyzǵa baqyt pen amandyq tileı otyryp, Vasılkov kenishiniń ataýyn «Altyntaý» dep ózgertý jóninde usynys aıtqym keledi. El tarıhynda aıshyqty orny bar Kókshetaýdyń Altyn taýy bıikteı bersin!», degen sózi keltirilgen.

«Egemen Qazaqstan» gazetiniń Úkimet basshysynyń baspasóz qyzmetine silteme jasap habarlaýynsha, keshe Úkimet úıinde Premer-Mınıstr Kárim Másimovtyń tóraǵalyǵymen 2011 jyly Astana men Almaty qalalarynda ótetin Azıada oıyndaryna daıyndyq jáne ony ótkizý jónindegi uıymdastyrý komıtetiniń kezekti májilisi ótti. Keńeske qatysýshylar Azıada nysandarynyń qurylysy men qaıta jańartý jumystarynyń barysyn, qajetti ınfraqurylymdar tartý jumystaryn, sondaı-aq oıyndardy uıymdastyrý jáne ony ótkizý, qoǵamdyq qaýipsizdik pen quqyqtyq tártipti qamtamasyz etý, sporttyq jáne resmı sharalardy teleradıotranslıatsııalaý máselelerin talqylaǵan. «Májilistiń qorytyndysy boıynsha Kárim Másimov múddeli mınıstrlikter men vedomstvolarǵa barlyq problemaly máselelerdiń jedel sheshilýin qamtamasyz etýdi tapsyrdy», dep jazady basylym.

Osy basylymnyń «Parlament» arnaýly betinde Májilis depýtaty Amangeldi Momyshevtiń «Qashanǵy qas-qabaǵyna qaraımyz?» degen maqalasy jaryq kórdi. «Beıresmı kózderden alynǵan derekter boıynsha, qyrǵyz jaǵynyń sý berýdi toqtatýynyń týyndaýyna Qazaqstan jaǵynyń memlekettik shekarany jabýy sebep bolǵan sııaqty. Elbasymyz shekarany ashýǵa ruqsat jasaǵannan keıin, mamyrdayń 20-synan bastap sýdy jaılap jiberýge ruqsat berilgen. Osyndaı áreketterdiń arqasynda sýdyń basynda otyrǵan qyrǵyzdar ómir boıy kez kelgen jaǵdaıda bizge qoqan-loqqy kórsetip, bizdi qorqynyshta ustamaqshy», dep atap ótken depýtat bul oraıda Jambyl oblysynda sýarmaly jerlerdi sýmen qamtamasyz etý maqsatynda sý qoımasyn salyp, sýdy kóktemde jınap alý kerek degen oıyn alǵa tartady. «Áıtpese, bizdiń kórgen kúnimiz kún bolmaýy múmkin. Sol sebepti Qordaı, Merki aýdandarynda, Taraz qalasynyń joǵary aýmaǵynda sý qoımasyn soǵý qajettiligi týyndap otyrǵany anyq», dep qorytqan maqalasyn Májilis depýtaty.

***

«Alash aınasy» gazetiniń «Oı-kókpar» aıdarynyń búgingi saýaly - «Qýǵyn-súrginge qatysty NKVD-nyń arhıvin tolyq ashatyn ýaqyt jetken joq pa?». Osy saýalǵa jaýap bergen tarıh ǵylymynyń doktory, professor Mámbet Qoıgeldi «búginde túrli muraǵattardan ótken tarıhymyzǵa qatysty derekterdi alýǵa eshqandaı qıyndyq joq. Kóptegen qupııa materıaldar óz retimen zerttelip, jarııalanyp keledi. Qalaı bolǵanda da muraǵattar qoınaýy ony aqtaryp, qoparam deýshilerge tolyq ashyq. Onyń ústine, kezindegi NKVD-nyń, bolmasa basqa da qyzmetterdiń muraǵattary zań boıynsha 30 jyldan keıin-aq ashyla bastaǵan. Másele tarıhshy mamandardyń izdenisi men tanym-zerdesine, taqyrypty zertteýge múddeliligine baılanysty bolyp otyr», dese fılologııa ǵylymynyń kandıdaty, QazUÝ dotsenti, ólketanýshy ǵalym Saǵatbek Medeýbekuly «qýǵyn-súrgin tarıhyna kelgende biz Keńes ókimeti kezeńin ǵana alyp qarap júrmiz. Bul ózi búgingi kúnge deıin tolyqqandy zerttelip bolmaǵan tarıh. Onyń ústine bizdiń tarıhshylar osy máselede tek ótken ǵasyrdyń jıyrmasynshy-otyzynshy jyldaryn ǵana qamtyp júr. Anyǵyna keletin bolsaq, qazaqtyń qýǵyn-súrginge qatysty zobalań tarıhy ultymyzdyń 1731 jyldary Reseı ımperııasyna bodandyqqa kirgeninen beri bastaý alady», degen pikirin alǵa tartady.

«Tabıǵattyń tosyn minezin eshkim de toqtata alǵan emes. Bıylǵy kári quda qaharyn shyǵys jaqqa tókse, kóktemniń dúleı jaýyndy-shashyndy minezi ońtústik turǵyndaryn ábigerge salyp jatyr. Kúnine myń qubylǵan aýa raıy eshkimdi de «tosyn syıdan» qur qaldyryp jatqan joq. Mamyrdyń 27-si kúni túski saǵat 3-4-ter shamasynda kún kúrt buzylyp, Saryaǵash aýdanynyń tóbesinen shelektep jaýǵan jaýyn 40-50 mınýttaı toqtamaı turyp aldy. Burshaq ta aralasty. Sonyń saldarynan áp-sátte saı-saıdy qýalaı aqqan sý ondaǵy úılerdiń ishine sýmańdaı kirip, jambastap jatyp aldy», dep jazady «Alash aınasy» gazeti. Oqıǵanyń mán-jaıyn basylymnyń senbilik sanyndaǵy «Saryaǵashty sý aldy» degen maqaladan oqı alasyzdar.

***

«Aıqyn» gazetiniń senbilik nómirinde fılologııa ǵylymynyń doktory, professor Tursyn Jurtbaıdyń «Alash qaıratkerleri ashtyqpen qalaı kúresti» degen taqyryppen kólemdi maqalasy jaryq kórdi. Qazaq halqynyń basyna túsken sol bir náýbet jyldar jaıynda naqty tarıhı derekterge súıenip jazylǵan maqalanyń egjeı-tegjeıin oqyǵyńyz kelse, basylymnyń senbilik sanyna nazar aýdaryńyz.

Aldaǵy juma kúni respýblıka boıynsha Ulttyq biryńǵaı testileý synaqtary bastalady. Osy mańyzdy is-shara qarsańynda QR Bilim jáne ǵylym mınıstri Almaty qalasyna arnaıy baryp, BAQ ókilderiniń saýaldaryna jaýap bergen. Janseıit Túımebaevtyń UBT-yǵa baılanysty jýrnalısterdiń suraqtaryna bergen jaýaptaryn «Aıqyn» gazetiniń senbilik nómirinen egjeı-tegjeıli oqýǵa múmkindik bar.

***

«Astana aqshamy» gazetiniń senbilik nómirinde mamyrdyń 31-i saıası qýǵyn-súrgin qurbandaryn eske alý kúnine oraı birqatar maqalalar toptamasy jarııalanǵan.

«Keshe Astanada alǵash ret ınnovatsııalyq jobalardyń forýmy ótti», dep jazady «Astana aqshamy» gazeti. Basylymnyń baıandaýynsha elordamyzdyń ekonomıkasyna zamanaýı tehnologııalardy engizýdi yntalandyryp, suhbat alańyn qurýdy nıet etken jıynǵa elimizdiń túpkir-túpkirinen 200-ge jýyq delegat qatysyp, bilim men densaýlyq, ekologııa, aýyl sharýashylyǵy syndy salalarǵa tyń serpin beretin 60-tan astam joba usynylǵan.

***

«Kazahstanskaıa pravda» gazetiniń jazýynsha, keshe Premer-Mınıstr Kárim Másimov Astanada Qazaqstan Áskerı-Áýe kúshteriniń avıatsııalyq bazasynyń aýmaǵynda ótip jatqan Qarý-jaraq, áskerı tehnıka jáne áskerı-tehnıkalyq múlikterdiń І «KADEX-2010» halyqaralyq kórmesinde boldy. Úkimet basshysynyń nazaryna Qazaqstan Respýblıkasy Qarýly Kúshteriniń áskerı tehnıka úlgileri men arnaýly bólimderiniń qatysýymen kórneki baǵdarlama usynylǵan.