Elbasy Almatydaǵy Shyǵys aınalma jolynyń qurylysymen tanysty

Atalǵan joldyń jalpy uzyndyǵy - 7,8 shaqyrymdy quraıdy. Búginge deıin onyń 5,6 shaqyrymy salynyp bitken. Aldaǵy ýaqytta 2,2 shaqyrym jol salynýy qajet. «Atalǵan jol qala ishindegi joldardyń ótkizý múmkindigin táýligine 25 myń kólikke azaıtýǵa múmkindik beredi», dedi Elbasyna jol týraly baıandaǵan qala ákimi A.Esimov.

Elbasy óz kezeginde bul joldyń qala ekologııasyn jaqsartýǵa úlken múmkindik beretinin atap ótip, qalǵan bóligin salyp bitirý qajettigine toqtaldy. «Qalanyń ekologııasyn jaqsartý boıynsha Almatyda kóptegen jumystar jasalýda. Aldaǵy ýaqytta gazben jumys isteıtin avtobýstar júrgizý, júk kólikteriniń qalaǵa kirýine tyıym salý syndy birqatar sharalar jasalady. Úlken aınalma joly salynady. Bunyń bári súıikti qalamyzdyń ekologııasyn jaqsartady. Sondyqtan bul jumystar júzege asýy kerek. Aıta ketetin taǵy bir másele, bul joldar salynatyn jerlerdi kezinde zańsyz basyp alǵan, nemese satyp alǵandar tarapynan kedergiler kóp bolýda. Olardyń qatarynda sheneýnikter de bar. Eger olar satyp alǵan kezindegi baǵamen jerdi memleketke qaıtarmasa, bolashaqta biz ol jerlerdi memleket múddesi úshin keri alamyz. Kezindegi jekeshelendirýdiń qalaı júrgenin biz jaqsy bilemiz. Sondyqtan kezinde jerlerdi basyp alǵandar óz erikterimen ony memleketke qaıtarǵandary jón», - dedi Elbasy.

Sondaı-aq Memleket basshysy óz sózinde qala turǵyndarynyń da qala ekologııasyn saqtaýǵa qoldaý bildirýi qajettigin atap ótti. «Biz jańa stadıondar salamyz. Biraq sol qurylystardy kópshilik el kútip ustamaıdy, tazalyq saqtamaıdy. Barlyq ıgilik halyq úshin jasalýda. Sony túsinýimiz qajet. Qazir daǵdarys ýaqytyna qaramastan, Azııa oıyndaryn ótkizgeli otyrmyz. Bul bizge óte qymbatqa túsýde. Degenmen, Azııa oıyndary ótkiziletin nysandar aldaǵy ýaqytta halyq ıgiligi úshin qalatyn bolǵan soń osylaı istep otyrmyz», - dedi Elbasy N. Nazarbaev.