Elbasy áleýmettik nysandardyń salyný qunyndaǵy alshaqtyqtarǵa qatysty oblys ákimderine eskertý jasady
ASTANA. 11 qazan. QazAqparat - Búgin Aqordada elimizdiń ótken 9 aıynyń damý qorytyndylaryna arnalǵan Úkimettiń keńeıtilgen otyrysynda Memleket basshysy Nursultan Nazarbaev oblys ákimderine áleýmettik nysandar salý barysyndaǵy olardyń qunyna qatysty eskertý aıtty.
«Óńirlerde birdeı áleýmettik nysandar, birdeı mektep qurylystary ár túrli baǵamen salynady. Bul qalaı? Buǵan nazar aýdarǵan bireýiń bar ma? Aqmola oblysynda 1200 oryndyq bir mekteptiń quny ekinshi bir 900 oryndyq mektepke qaraǵanda 219 mln. teńgege arzan salyndy. Aıyrmashylyǵy qandaı? Bir oblysta, bir jerde otyryp nege bulaı bolady? 900 oryndyq mekteptiń quny men 1200 oryndyq mekteptiń quny arasynda nege mynadaı aıyrmashylyq ketip otyr?» - dedi Elbasy jıyn barysynda.
Osyǵan oraı, Memleket basshysy oblys basshylarynyń basty nazary áleýmettik nysandar qurylysynda bolýy kerektigin tapsyrdy. Bul rette Elbasy Aqtóbe oblysyndaǵy osyndaı eki nysannyń arasyndaǵy 130 mln. teńge aıyrmashylyq bolǵanyn da alǵa tartty. Al Atyraý oblysyndaǵy birdeı tıppen salynyp jatqan eki emhananyń salyný qunyndaǵy aıyrmashylyq jarty mıllard teńgege bir-aq jetken. «Memlekettiń, eldiń aqshasynyń osylaı ketip jatqanyn menen basqa eshkim qaramaı otyrǵany ma, sonda? Mine, qarjy polıtsııasy, esep komıteti men barlyq baqylaýshy organdar osyndaı olqylyqtardy tekserýleri kerek. Al mynadan keıin oblystarǵa qalaı aqsha bólemiz? Men qansha ret tıptik mektepter men aýrýhanalar salý kerektigin aıtyp kelemin. Budan bólek, nysandar men jer ýchaskelerin satyp alý barysynda da tıisti qadaǵalaýlar joq. Máselen, Aqtóbe oblysy Shalqar aýdanynda 140 oryndyq quny 75 mln. teńgelik balabaqsha eki ese artyq baǵamen memleketke satyp alynǵan. Mundaı mysaldar jetedi. Sondyqtan oblys ákimderine eskertkim keledi: eger osyny qadaǵalaı almasańdar, onda sender eshteńeni de qadaǵalap otyrǵan joqsyńdar degen sóz. Sonda nemen aınalysatyndaryńdy túsinbeımin?» - dedi N. Nazarbaev.
Bul rette Memleket basshysy ásirese qurylys salasynda jańa tehnologııalar arqyly kúrdeli shyǵyndardy qysqartýmen aınalysý qajettigin atap ótti.
