Elbasy: Áleýmettik kapıtaldy kúsheıtý arqyly Qazaqstan bolashaǵyn bekemdep jatyr
«Osy jyldardyń ishinde 1300 zamanaýı medıtsınalyq qurylǵylarmen qamtylǵan aýrýhana, emhana men ambýlatorııa ashyldy. Osynyń arqasynda qazaqstandyqtardyń ómir uzaqtyǵy jaqsaryp, ólim-jitim azaıdy, analarǵa qoldaý kórsetildi. 1545 jańa mektep, 500-den astam balabaqsha - bizdiń balalardyń bolashaǵyna salynǵan salym. 70 stadıon, 36 sport saraıy, 70 myńnan astam sporttyq alań ashyldy. Bul - qazaqstandyqtardyń densaýlyǵy men balalardyń bolashaǵy úshin jasalyp jatyr. Mýzeılerdiń sany 2,7 esege, teatrlar 1,5 esege, kitaphanalar 4 esege kóbeıdi. Eshqashan tarıhta Qazaqstan aýmaǵynda osyndaı qysqa ǵana ýaqyttyń ishinde osynshama kóp áleýmettik nysan salynbaǵan», - dedi Memleket basshysy.
Prezıdent óz sózinde osynaý áleýmettik-mádenı jáne sporttyq nysandar eldiń barlyq azamattary úshin jumys istep turǵanyn, árbir qazaqstandyq óziniń kúndelikti eńbegi arqyly el damýyna óz úlesin qosyp jatqanyn atap ótti.
«Osylaısha, biz kúndelikti ómirde bálkim umytyp, baıqamaı da júrgen shyǵarmyz. Bizdiń barlyǵymyz búkil el bolyp Qazaqstannyń ósip kele jatqan áleýetine úles qosyp kelemiz. Elimiz qanshalyqty baı bolsa, memleketimizdiń árbir azamaty sonshalyqty dáýletti bolady», - dedi Prezıdent.
Nursultan Nazarbaev áleýmettik kapıtaldy kúsheıtý arqyly Qazaqstan bolashaǵyn bekemdep jatqanyn tilge tıek etti.
«Bul - pragmatıkalyq shyndyq. Sebebi, áleýmettik kapıtal - adam men qoǵamnyń ósýin muryndyq bolatyn áleýet. Jan basyna shaqqanda ishki jalpy ónim baǵytynda biz uzaq joldy basyp óttik: 600 dollardan 10 myń dollarǵa deıin jettik. Devalvatsııa bolmaǵan jaǵdaıda biz kórsetkish odan da joǵary bolar edi. Áleýmettik kapıtalǵa ınvestıtsııany arttyrýǵa múmkindik beretin baza da - osy. Bir ǵana mysal: qańtar aıynda Búkilálemdik ekonomıkalyq forýmda memleketterdiń ekonomıka aýqymyn baǵalaýdyń jańa júıesi engizildi. Ol - eksklıýzıvti damý ındeksi dep atalady. Ol JІÓ-niń ósimimen jáne ózge de 11 parametrmen esepteledi. Osy 11 parametrdiń ishinde eń bastysy - ál-aýqatqa mańyz berildi. Mine, damýshy 74 memleket engen reıtıngte Qazaqstan 15-shi oryn aldy. Meniń oıymsha, bul bizdiń jumystyń laıyqty nátıjesi degen oıdamyn», - dedi Nursultan Nazarbaev.
Aıta ketsek, elordadaǵy Beıbitshilik jáne kelisim saraıynda Elbasy Nursultan Nazarbaevtyń tóraǵalyǵymen Qazaqstan halqy Assambleıasynyń XXVІ sessııasy ótip jatyr.
«Bes áleýmettik bastama - qoǵamnyń áleýmettik birliginiń tuǵyry» degen kún tártibimen bastalǵan sessııa jumysyna 1 500-den astam adam qatysýda. Olardyń qatarynda eldiń barlyq óńirlerinen kelgen Assambleıanyń ardagerleri, respýblıkalyq jáne óńirlik etnomádenı birlestikterdiń tóraǵalary, Parlament depýtattary, ortalyq atqarýshy organdardyń, saıası partııalardyń, dinı birlestikterdiń, úkimettik emes uıymdardyń basshylary, JOO rektorlary, shet memleketterdiń dıplomatııalyq mıssııalarynyń, ǵylymı, shyǵarmashyl zııaly qaýymnyń jáne BAQ-tyń ókilderi bar.
Sessııa sońynda saltanatty kontsert ótedi.
