Elbasy: Aldaǵy saılaý halyqty bıik maqsattarǵa jumyldyrýy tıis

NUR-SULTAN. QazAqparat - Prezıdent saılaýy halqymyzdy bıik maqsattarǵa jumyldyrýǵa tıis dep sanaımyn. Bul týraly «Nur Otan» partııasynyń kezekten tys HІH sezinde QR Tuńǵysh Prezıdenti - Elbasy Nursultan Nazarbaev málim etti, dep habarlaıdy QazAqparat tilshisi.

«Elimizdegi bılik sabaqtastyǵyn jalǵastyrý - Ata Zańymyzǵa tolyq sáıkes keledi. Eki apta buryn Memleket basshysy Qasym-Jomart Kemeluly Toqaev kezekten tys saılaý ótkizý týraly Jarlyqqa qol qoıdy. Bul jan-jaqty oılastyrylyp jasalǵan qadam. Qasym-Jomart Kemeluly árbir iske zor jaýapkershilikpen qaraıtyn memleket qaıratkeri. Ol aıqyn saıasat júrgizýdiń qanshalyqty mańyzdy ekenin jaqsy biledi», - dedi Elbasy.

Osy oraıda N. Nazarbaev Qazaqstan búkil álemge demokratııalyq damý jolyn tańdaǵanymyzdy taǵy da bir kórsetkenin atap ótti.

«Prezıdenttik ókilettigimdi toqtatqannan soń, birqatar elderdiń basshylarymen sóılestim. Kópshiliginen áli kúnge deıin hattar kelip túsip jatyr. Solardyń barlyǵy bılikti berýdiń ózindik úlgisin júzege asyryp jatqanymyzǵa qurmetpen qaraıtynyn jetkizdi. Eń aldymen, aldaǵy Prezıdent saılaýy halqymyzdy bıik maqsattarǵa jumyldyrýǵa tıis dep sanaımyn. Elimiz úshin turaqtylyq pen tatýlyqtan artyq esh nárse joq. Tynyshtyqta ómir súrip, alańsyz eńbek etkenge, baqytty urpaq tárbıelegenge ne jetsin. Mine, eń bastysy osy», - dedi Tuńǵysh Prezıdent.

Esterińizde bolsa, 9 sáýirde respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev elimizdiń Konstıtýtsııasyna sáıkes QR Prezıdentiniń kezekten tys saılaýyn 2019 jyldyń 9 maýsymda ótkizý týraly sheshim qabyldaǵanyn jarııa etken bolatyn.