Elbasy: Alash ıdeıasy - ata-babanyń derbes el bolý jolyndaǵy amanatymen ushtasyp jatyr

ASTANA.QazAqparat - Astanadaǵy EKSPO Kongre ortalyǵynda Alash partııasynyń qurylǵanyna 100 jyl tolýyna oraı «Rýhanı jańǵyrý: Alash jáne Azattyq ıdeıasynyń sabaqtastyǵy» atty halyqaralyq ǵylymı-tájirıbelik konferentsııa bastaldy, dep habarlaıdy «QazAqparat»HAA tilshisi.

Halyqaralyq deńgeıdegi jıynǵa elimizdegi beldi alashtanýshylar, QR Memlekettik hatshysy Gúlshara Ábdiqalyqova, Parlament Májilisiniń depýtattary, Túrkııa, Reseı, Ázerbaıjan elderinen ǵalymdar qatysýda.

Jıyn barysynda Gúlshara Ábdiqalyqova qatysýshylarǵa QR Prezıdenti Nursultan Nazarbaevtyń quttyqtaý sózin oqyp berdi.

«Barshańyzdy konferenıtsıa jumysynyń bastalýymen shyn júrekten quttyqtaımyn! Alash qozǵalysynyń 20 ǵasyrdyń basyndaǵy qazaq qaýymynyń saıası-áleýmettik quqyqtaryn qorǵaý, ulttyq biregeıligin saqtap qalý jolyndaǵy kúresi elge qyzmet etýdiń jarqyn kórinisteriniń biri. Alash qozǵalysynyń passıonarlyq ıdeıalary bizdiń ata-babalarymyzdyń azattyq alyp, derbes memleket qurý jolyndaǵy san ǵasyrlyq amanatymen ushtasyp jatyr. Sol kezdegi ult zııalylary arman etken memleket táýelsizdigi men ult bostandyǵyna búgingi urpaq qol jetkizdi. Elimiz egemendik alyp, álemniń aldyńǵy qatarly memleketterimen terezesin teńestirip otyr. Men «Bolashaqqa baǵdar: Rýhanı jańǵyrý» atty maqalamda taǵylymy mol tarıhymyzdy zerdeleýge, tóltýma mádenıetimizdi qoldaýǵa qatysty naqty mindetterdi atap kórsettim. Biz qoǵamdyq sanany qazirgi zamannyń talabyna saı jańǵyrtý arqyly elimizdiń turaqty damýyn qamtamasyz etýdi maqsat etip otyrmyz. Memleketimizdiń ekonomıkalyq áleýeti arqyly halqymyzdyń baı tarıhı ári rýhanı murasyn dáripteýge de zor múmkindik jasala bermek. Búgingi keleli jıynda tarıhymyzdyń táýelsiz el ómirimen sabaqtastyǵyn ashyp kórsetetin dáıekti pikirler, ǵylymı izdenisterdiń nátıjeleri jarııa etiledi dep kámil senemin. Konferentsııanyń jumysyna tabys tileımin», - dep Gúlshara Ábdiqalyqova Elbasynyń quttyqtaý hatyn aıaqtady.

Konferentsııanyń Plenarlyq májilisi HH ǵasyr basyndaǵy álemdi silkindirgen oqıǵalar aıasyndaǵy Alash qozǵalysynyń qyzmetin ashyp kórsetken sektsııalyq basqosýlarǵa ulaspaq. Jıyn sońynda ǵylymı-tájirıbelik konferentsııaǵa qatysýshylar Alash arystaryn ulyqtaý, olardyń muralaryn zertteýdi júıelep, jas urpaqty patrıottyq rýhqa tárbıeleý isin Alash murattarymen sabaqtastyrý máseleleri kórinis tabatyn qarar qabyldaýdy josparlap otyr.