Elbasy akademık Sharmanovty 80 jyldyq mereıtoıymen quttyqtady
Y. Qazannyń 22-si. QazAqparat /Názıra Eleýhan/ - Elbasy Nursultan Nazarbaev medıtsına ǵylymdarynyń doktory, professor,
Reseı medıtsına ǵylymdarynyń jáne QR Ulttyq ǵylym akademııasynyń akademıgi, Qazaq taǵamtaný akademııasynyń jáne Profılaktıkalyq medıtsına akademııasynyń prezıdenti, QR eńbek sińirgen qaıratkeri Tóregeldi Sharmanovtyń 80 jyldyq mereıtoıymen quttyqtap, hat joldady.
Quttyqtaý hatty búgin Almatyda ótken «Taǵamtaný jáne densaýlyq» atty halyqaralyq ǵylymı-tájirıbelik konferentsııa barysynda Almaty qalasynyń ákimi Ahmetjan Esimov oqyp berdi.
«Qurmetti Tóregeldi Sharmanuly! Siz eńbek jolyńyzdy aýyl dárigeri bolyp bastap, elimizdiń densaýlyq saqtaý mınıstrine deıingi qyzmetterdiń bárin de abyroımen atqaryp, jurtshylyqtyń shynaıy alǵysy men qurmetine bólenip kele jatqan azamatsyz. Qaı iste de ózińizdi bilimdi maman, daryndy uıymdastyrýshy, qashanda el múddesin basty mindet sanaıtyn, jan-júregińiz taza tulǵa retinde tanyta bildińiz. Ǵylym jolyndaǵy qyzmetińizdiń de óte jemisti ekenine súısinemiz. Ǵylym doktory, professor, Medıtsına ınstıtýtynyń rektory, KSRO Medıtsına ǵylymı akademııasynyń akademıgi bola júrip, júzdegen ǵylymı eńbekter jazdyńyz. Álemdik medıtsına salasyna qosqan úlesińiz Dúnıejúzilik densaýlyq saqtaý uıymynyń Leon Bernard atyndaǵy halyqaralyq syılyǵymen atap ótildi. Keıingi jastarymyz árdaıym ózińizdeı abzal aǵalarymyzdyń jolyn ustap, ónegesin úlgi tutyp ósse eken deımin.Aman bolyńyz, Tóke! Zor densaýlyq, uzaq ǵumyr, baıandy baqyt tileımin!», - delingen Memleket basshysynyń quttyqtaýynda.
