Elbasy: 2015 jylǵy sheteldik saparlarymnyń nátıjesinde $ 60 mlrd. quraıtyn 275 kelisimge qol qoıyldy
ASTANA. QazAqparat - Búgin Aqordada Qazaqstanda tirkelgen sheteldik dıplomatııalyq mıssııalar basshylarymen kezdesý barysynda QR Prezıdenti Nursultan Nazarbaev Qazaqstannyń syrtqy saıası qyzmetindegi nátıjelerdi aıtty.
«Ótken jyl Qazaqstannyń belsendi syrtqy saıası is-qımylymen belgilendi. Meniń edáýir sheteldik saparlarym barysynda álemniń kóptegen elderimen 60 mlrd. dollarǵa jýyq somaǵa 275 ekonomıkalyq kelisimge qol qoıyldy»,-dep toqtaldy Elbasy.
Prezıdent «Úlken jıyrmalyqqa» múshe elderdiń jáne ózge memleketterdiń kóptegen kóshbasshylarymen kezdesýler ótkizgenin eske salyp ótti. Osy oraıda N. Nazarbaev olar Qazaqstanmen kóp josparly yntymaqtastyqty nyǵaıtýda ózara qyzyǵýshylyqty rastaǵanyn atady.
«Sizderdiń QR Syrtqy ister mınıstrligimen birlesken jumystaryńyzda joǵary deńgeıde qol jetkizilgen ýaǵdalastyqtardy júzege asyrýǵa ekpin qoıýǵa usynamyn. Bul óz kezeginde bizdiń qatynastardy nyǵaıtyp, memleketterdi jaqyndastyrady. Osy maqsat-mindetti bıylǵy 3 aqpanda ótken keńeıtilgen alqa májiliste QR Syrtqy ister mınıstrligi basshylyǵy men elshilerge júktedim»,-dedi Memleket basshysy sheteldik dıplomattarǵa qaratyp aıtqan sózinde.
