El aýmaǵynyń 1:50 000 masshtabtaǵy naqty geologııalyq kartasy ázirlenedi
ASTANA. KAZINFORM — Geologııalyq salaǵa ınvestıtsııalar tartý úshin qolaıly jaǵdaı jasaý Úkimettiń erekshe nazarynda bolady. Búgin Úkimet otyrysynda Premer-mınıstr Oljas Bektenov beıindi vedomstvolarǵa osyndaı tapsyrma júktedi.
— Ónerkásip mınıstrligi osy jyldyń sońyna deıin el aýmaǵynyń 1:50 000 masshtabyndaǵy naqty geologııalyq kartasyn jasaý úshin jobalaý-smetalyq qujattamany ázirleýdi qamtamasyz etsin. Ónerkásip mınıstrligi Qarjy mınıstrligimen birlesip, 2026 jyly kartalardy ázirleýdiń zamanaýı ádisterine kóshý jobasyn iske asyrýǵa kirisýi kerek. Ol úshin ozyq tehnologııalar men pılotsyz ushý apparattaryn barynsha paıdalaný qajet, — dedi Úkimet basshysy.
Sonymen qatar Oljas Bektenov Ónerkásip mınıstrligine múddeli memlekettik organdarmen birlesip, 2026 jyldyń birinshi jarty jyldyǵynyń sońyna deıin jer qoınaýyn paıdalanýdyń biryńǵaı platformasy aıasynda keńistiktik derekterdi ıntegratsııalaýdy qamtamasyz etýdi tapsyrdy.
— Bul ınvestorlarǵa jer qoınaýyn paıdalaný salasyndaǵy múmkindikter men shekteýlerdi kórip, baǵalaýyna múmkindik beredi. Qoryta aıtqanda, geologııalyq salany qoldaý, ony qarjylandyrý kólemin ulǵaıtý, ınvestıtsııalar tartý úshin qolaıly jaǵdaılar jasaý Úkimettiń erekshe nazarynda bolady, — dedi Premer-mınıstr.
Aıta keteıik, 2026-2028 jyldary elimizdiń 100 myń sharshy shaqyrym aýmaǵy zertteledi.