El aýmaǵynda qaıyqtardy tekserý bastalady — TJM
ASTANA. KAZINFORM — Demalys oryndaryndaǵy jaǵalaýlarǵa jasandy ıntellekt arqyly beınebaqylaý júıeleri engizilip jatyr. Bul týraly Úkimet otyrysynda QR Tótenshe jaǵdaılar mınıstri Shyńǵys Árinov málim etti.
— Demalys obektileri men aımaqtarynyń, týrıstik bazalardyń órt qaýipsizdigin qamtamasyz etýge, sondaı-aq jaǵajaılarda jáne sýǵa shomylý oryndarynda qaýipsizdik talaptarynyń saqtalýyna erekshe nazar aýdarylady. Jazǵy maýsymǵa daıyndyq aıasynda 500-ge jýyq obekti men jaǵajaı tekserilip, nátıjesinde 800-ge jýyq qaýipsizdik talaptaryn buzý deregi anyqtaldy. Bul rette demalys oryndarynyń ıelerine ádistemelik kómek kórsetildi, tótenshe jaǵdaılar kezinde áreket ete bilý nusqaýlyqtary men praktıkalyq jattyǵýlary ótkizildi, — dedi Sh. Árinov.
Onyń aıtýynsha, jaqyn arada Mınıstrlikke shaǵyn kólemdi kemelerdiń qaýipsiz paıdalanylýyn baqylaý-qadaǵalaý fýnktsııasy beriledi. Tekserý sharalary 1 shildeden bastalady.
— Elimizdiń sý aıdyndaryndaǵy shaǵyn kólemdi kemeler men turaq-bazalaryna tekseris júrgizilip, erejeni buzý jaǵdaıy anyqtalsa, jedel den qoıý sharalary qabyldanady. Sonymen qatar, jergilikti atqarýshy organdarmen birlesip, jaǵalaýdy jasandy ıntellekt arqyly beınebaqylaý júıelerin kezeń-kezeńmen engizip jatyrmyz. Atalǵan júıe Alakólde ornatyldy. Tótenshe jaǵdaılardyń aldyn alý úshin turǵyndar men týrıster arasynda ózin qaýipsiz ustaı bilý profılaktıkasy kúsheıtildi, — dedi mınıstr.
Sonymen birge, barlyq ulttyq parkter bank servısteri arqyly onlaın tólemge qosylǵan.
Buǵan deıin týrızm salasynda 600 myńnan astam adam jumyspen qamtylǵanyn jazǵan edik.
